Evelina Solstenis, 22, leat badjel 40 000 čuovvojeaddjit Instagram:as ja badjel 70 000 čuovvojeaddjit TikTok:as.

Muhto muitalit beaivválaš eallima birra ii leat nu álkit Solstenii guhte beaivválaččat vásiha vaši.

-Leat uhkkidan goddit mu bohccuid, uhkkidan ahte nuppádis go oidnet ”lappjävela” de galget fallehit. Min leat dušši álbmot mat eat galggaše gávdnot, son dadja ja joatka:

-Dat leat ilgadis ja unohas diŋggat, ereliiggánit go diehtá ahte dát vaššerihkkomat duođas dáhpáhuvvet sápmelaččaide ja biinnidit ja goddet bohccuid. Eai leat dušše sánit go dat dáhpáhuvva duođas ja dat lea dat ilgadeamus.

Ii ilmmut poliissaide

Vaikko leat vaššerihkkomat de ii leat goassige ilmmuhan poliissaide.

-Lea duođas heittot ja lean álgán jurddašit manne in daga dan, diehtemeahttolaččat jurddaša ahte ii váldo duohtan go olbmot ilmmuhiid iežá áššiid.

Maid don jurddašat go dáid logat?

-Munnje ii baste nu garrasit go earáide, muhto dieđusge ballán. Dat lea unohas lohkat daid, vaikko ii čuoža munnje persovnnalaččat, šadda siskaldas hušša ja dainna ii veaje bures.

”Vuolgá diehtemeahttunvuođas”

Seammeáiggi sus lea buolli indu dieđihit.

-Mon lean álo vásihan diehtemeahttunvuođaid ja ovdagáttuid ja daid hálidan eastit. Mon in sáhte doallat daid iežan siste, hálidan selehit.

-Dat váhtá dieđuid ja fuomášumi, mon oainnan ahte olu dan vašis vuolgá diehtemeahttunvuođas. Máŋgasat jáhkket ahte ferte bargat hui olu muhto sáhttá leahkit doarvái ahte levge sámi leavgga.

Son maid oaivvilda ahte ii leat beare vašši, máŋgasat háledit maid oahppat.

-Dat lea olu vašši muhto máŋgasat háledit maid oahppat ja danin mon ráhkadan dákkár diŋggaid go oainnan ahte nu ollusat liikojit ja váldet vuhtii maid čálán ja muitalan.