Ruoŧas daddjui golbma jáge dás ovdal ahte boahtte áiggis lea vejolaš muhto EU dihte leat ráddjehusat. Aŋkke lea okta EU-riika, Suopma, čađahan rievdadusa.

Go SVT Sápmi jearrá manin ruoŧabeale Sápmi ii velge leat almmuhan sámegiela ruoŧa pássain de vástádus lea oalle formálalaš, ii gávdno sadji ja jus šaddet rievdadusat  de dat goit ádjána.   

– Ahte teavstta sturrodat livčči ággan manne eai sáhte čálmmostahttit sámegiela Ruoŧa passain  lea juoga masa Nadja Östergren reagere.   

– Sámegiella dárbbaša oidnot, ii dušše sidjiide geat hupmet giela muhto maiddai olles Ruŧŧii lea hui dehálaš.

Jearaldat lea leamaš beavddis ovdal, čállá poliissa proseassaovdaolmmoš.

Ruoŧŧa šaddá maŋemus riika Davviriikaid gaskas gos ii leat vel beaivemearri goas teakstasturrodat ja eara rievdadeamit bohtet čađahuvvot. Ná vástida proseassaovdaolmmái jearaldahkii:

– Ovddit hábmemis  šiehtadalle bidját sámegiel teavstta, muhto dađi bahábut eai geargan gieđahallat visot jearaldagaid.

Dan maid sii gerge gieđahallat lei ahte sámegiella sáhttá almmostuvvat ruoŧa pássain. Lea bargu mainna fas bohtet joatkkit go álget hábmet ođđá mátkkostanáššebáhpáriiid. Áigemearri ii vel gávdno.

Nadja Östergren imáštalla ja atná veháš heahpadin.

– Olggobealde orro imaš ahte mis leat guokte ránnjáriikat geain lea sámegiella sin pássain. Mu mielas dát čájeha ahte Ruoŧŧa ii leat gearggus bargat seamma olu dan ovdii ahte čalmmustahttit sámegiela nu movt min ránnjáriikat dahket.

Son ii duostta árvidit goas Ruoŧa pássain lea sámi teaksta.

– Sávvamis ii ádján guhká, dadja Nadja Østergren.