Háldi dutkosa ulbmil lea čatnat oktii sámi ja Ruoŧa dearvvasvuođadivssu, dadjá Per Axelsson, ovddasvástideaddji, Háldi prošeavttas.

Visot rávesolbmot Johkamohki suohkanis galget bovdejuvvot Háldi prošeavtta iskkussiida, mat bistet gávcci vahku ovddusguvlui. Suohkanis orrot lagabut vihtta duhát olbmot ja dán rádjai leat sulla 12 čuođis ilmmuhan ahte sii bohtet.

– Mu bargu lea dárkkistit ahte buot iskosat maid mii dahkat dáppe dahkkojit riekta, ja ahte mii oaččut nu buriid ja rievttes bohtosiid go vejolaš. Ja dieđusge maiddai ahte lea sihkkarvuohta ja oadjebasvuohta medisiinnalaččat oasseváldiide go bohtet diehke, dadjá Risten Utsi, medisiinnalaš ovddasvástideaddji, Háldi prošeavttas. 

Vuorrasat iskojuvvojit ereliiggán dárkilit, go lea unnán dutkojuvvon vuoras olbmuid birra. Ovdalas dutkamat leat vuosehan ahte leat erohusat vuoras sámiid ja iežáid gaskkas jus geahččá váibmovigiide ja borasdávddaide.

– Muhtin dávddaid birra sin eai dieđe maide, dego reumatisma ja muittohisdávddaid birra, dadjá Katarina Nägga, vuorrasiiddávddaid dutki, Háldi prošeavttas.

Háldi prošeakta álggii juo jagi 2018 ja Johkamohkki suohkan válljejuvvui dego geahččalansuohkaniin.

-  Mu sávaldat livččii ahte mii beassat joatkit dakkárlágan dutkosiid miehta Ruoŧa, dadjá Risten Utsi.