Girji lea Ruoŧa boazosámi bearrašiid birra, geat 100 áigi bákkus sirdojuvvo Gárasavvonguovllus lullelii Ruoŧas go Ruoŧa boazosápmelaččat eai beassan šat johtit Norgga riddui.

– Stáhta bággosirdin lea háddjen sámi bearrašiid, sogaid ja ustitvuođaid botken bággojohtimiid geažil. Dat šadde johtit amas guovlluide, gos báikkálaš sámit šadde dohkkehit sirddolaččaid vieruid ja giela, muitala Giron Sámi Teáhtera hoavda Åsa Simma preassadieđáhusas.

Girječállis alla vuordamušat

Jagi 2020 oaččui ”Hearrát dat bidje min” girji August-bálkkašumi, dán jagáš Ruoŧa diehtogirjin.

– Lean álo liikon teáhterii ja beassan mannat sámi čájálmasain dan rájis go ledjen unni. Dalle ii gávdnon nu olu filmmat ja tv sámi sisdoaluin, muhto teáhter gusto gávdnui. Dat lea guođđan hui fiinna luottaid sillui ja lean hui ilus ahte ”Hearrát dat bidje min” girji beassá dan máilbmái, dadjá girječálli Elin-Anna Labba.

”Vuorddán iežá máilmmi go dan maid lean čállan”

Malin Stenberg galgá buvttadit teáhterčájálmasa Stina Oskarsson giehtačállosa vuođul. Ulbmila mielde galget johtit miehtá Sámi dainna čájálmasain.

– Vuorddán iežá máilmmi go dan maid lean čállan, teáhter lea teáhter ja girji lea girji ja háliidan daidda addit friddjavuođa bargat dáiddalaččat. Šaddá gelddolaš oaidnit muitalusaid goruda ja lihkastagaid, mon han lean eanemusat eallan daiguin jienaiguin ja govaiguin. Vuorddán vel čierrut. Mun ain čierun go gulan daid muitalusaid vaikko lean nu guhká leamaš daid searvvis, dadjá Elin-Anna Labba.