Gástajuolgi láve dábálaččat leahkit Faepmie girku áltáris. Gástajuolgi geavahuvvui dalle go gásttašedje su ja su boarraseamos bártni ja jurdda leai maid geavahit dan su nuoramus máná gásttašeapmái. Muhto dál dat lea láhppon- ja lea eahpečielggas goas lea láhppon.
– Mii leat ohcán ja jearahallan olbmuin jus leat oaidnán máidege muhto ii oktage dieđe das maidege. Girkus ii oaččo doalvut ja sirdit diŋggaid vaikko got jus ii leat sierra lohpi leanastivrras ja dalle ipmirdisgođiime ahte leai suoláduvvon, dadjá son.
Dat áidnalunddot gástajuolgi šálljaruohttasis leai dahkkon dáiddáris Bruno Alenius maid son 1970-logus attii girkui .
– Juolgi lea stuorat ja lossat. Dan ii leat dušše guoddit olggus. Muhto ii oktage lea vel oidnán ja dieđihan maidege das ja mii eat sáhte go árvidit gosa lea šaddan, dadjá Annica Berg
Váttis dadjat mii lea dáhpáhuvván.
Faepmie girku lea hui bivnnuhis báiki juo don dolin, sihke náitalit ja gásttašit mánáid. Dál leat turisttat maid fuobmán girku.Parkerensajis girkui lea dušše moadde čuohti mehtera ja girku lea dábálaččat rabas gusiide juohke beaivvi dii 08-20. Dat dagaha váttisvuođa árvvoštallat gos ja goas gástajuolgi suoláduvvui.
Sávva gaskaboddasaš čovdosa
Sii geat dán geasi áigo gásttašit mánáid dan árbevirolaš gástajuolggis eai sáhte dan dahkat. Ášši lea váidaluvvon poliissaide muhto eai dieđe vel goppos guorahallan manná. Báhppa Maria Berg lea leanastivrras ozahan sierra lobi viežžat boares gástajuolggi searvegottidálus Vualtjeren Faepmie girkui vai besset mánáid gásttašit doppe. Son lea dál vuorddašeame vástadusa.
