Ellos eatnu lea dehálaš filbma, mas Álttá – stuimmiid duogáža birra muitaluvvo. Álttá – stuimmiid duogáš ledje Álttá – Guovdageainnu eanu báddadeapmi. Álgoulbmiliid mielde livčče Máze gilli šaddan čáze vuollái. Dát šattai sámi vuoigatvuođaid gižžu ja stuimmit dagahedje stuorámus bolesakšuvnna ráfiáiggi Norggas.
”Dehálaš filbma ja eandalii dál”
Neavttár ja artista Sofia Jannok neaktá filmmas ja son dadjá dát leat okta dain deháleamos filmmain mii lea dahkkon. Iige leat nu guhkes áiggi go dát lea dáhpáhuvvan ja dat ovttastahtii sámiid ja dagahii sámi vuoigatvuođaid oidnosii.
– Filbma lea dehálaš ja erenoamážit dán áiggi, dat muittuha dálá servodaga ja politihkkariid ahte ii leat guhkes áigi go lea dáhpáhuvvan dat ja dattege orrot seammá áššit dáhpáhuvvamin fas, dadjá Sofia Jannok ja joatká:
– Mun háliidan politihkkáriidda dadjat ahte: Dál lea doarvái!
Dás lea sáhka álgoálbmogiid ceavzimis
Vuossárgga álggii 33. Tromsö internationella filmfestival (TIFF) Romssas, mas Ellos eatnu filbma lea rahpanfilbman. Ella Marie Hætta Isaksen ja buvttadeaddji Ole Givær leat mielde rahpamis ja maiddái Sofia Jannok.
Filmma buvttadeaddji háliida čájehit man birra stuimmit ledje. Mo Norggas láhttejedje sámiiguin ja mo sámit leat rahčan iežaset vuoigatvuođaid ovddas. Álttá eanu stuimmit ledje unna, muhto dehálaš oassi dan stuorát giččus. Filmmas boahtá ovdán mo álgoálbmot rahčá iežas eallima dahje leahkima ovddas ja dat čuohcá millii.
”Ferte válljet guđe bealde lea”
Sofia Jannok oaivvilda ahte sisabahkkemat leat duvdimin sámiid eret ja mis ii leat gosa šat mannat. Dat ii váikkut dušše sámiide, muhto juohke ovtta olbmui min eatnamis. Son sávvá ahte dát muittuha olbmuid ahte sullasaš áššit dáhpáhuvvet ain dál.
– Mun sávan ahte dat geat gehččet filmma ležžet dal dábálaš olbmot dahje politihkkárat, ahte dat válljejit beali. Dál lea áigi válljet, háliidit go doarjut eallima vái jápmima, dadjá Sofia Jannok
Evttohuvvon Dragon Awardsii
Ellos eatnu čájehuvvo Norgga kinoin guovvamánu goalmmát beaivvi. Filbma lea Göteborga filbmafestivála váldogilvvus mielde, mas davvi riikkalaš filmmat gilvalit Dragon Awards bálkkašumis, vuoiti almmuhuvvo guovvamánu njealját beaivvi.