Ovddádusbellodat lea čielgaseamos dán deattuhan.
– Mis ii leat áigi atnit bohccuid ja visot iežá áššiid deháleabbon go riikka sihkarvuođa. Fertet dan vuoruhit ovddemus, dajai bellodatjođiheaddji Sylvi Listhaug NRK:i moadde vahku dás ovdal.
Dát cealkámus lei guovddážis go Sámediggi čoahkkanii dievasčoahkkimii dán vahku.
”Sámi vuoigatvuođat šaddet gillat”
Disdaga lei dievasčoahkkima vuosttaš beaivi ja dalle lei sihkarvuođadilli Sámis fáddán, eanet eahpesihkaris birrasis. Sámediggepresideanta Silje Karine Muotka ballá ovdáneamis mii dál lea Norgga bealde.
– Mii oaidnit dávjjit ja dávjjit ahte sámi beroštumit šaddet gillat – beroškeahttá das leago sáhka suodjaluspolitihkas, energiijapolitihkas dahje resursageavaheamis. Maŋemus vahkuid mii leat oaidnán go digaštallet ahte sámi vuoigatvuođat galget gillat vai Norgga suodjalus sáhttá nannejuvvot, dajai son sárdnestuolus.
”Eanet go kommersiealla beroštumit”
Nordkalottfolket presideantaevttohas Vibeke Larsen ii leat ovtta oaivilis Muotkain. Son deattuhii ahte sihkarvuohta olles Sámis ferte nannejuvvot.
– Sámi servvodagas lea nu ollu eanet go beare kommersiealla beroštumit. Presideanta oaivvilda ahte sámi servvodagaid sihkkarastin hehtte sámi vuoigatvuođaid suodjaleami, dajai Larsen.
Muotka vástidii:
– In oaivvil ahte áššit leat vuostálagaid visot oktavuođain, muhto mis lea dárbu čuovvut demokráhtalaš proseassaid ja buoret vugiiguin bargat. Go dahkat dan vel vuđoleabbo dáppe, de sáhttit sihkkarastit nanu suodjalusa.
Dievasčoahkkin lea Kárášjogas dán vahku gitta bearjadahkii. Maiddái Norgga bealde leat sámediggeválggat dán jagi, čakčamánu 8. beaivvi.