Boazoeatnamat miehtá Sámi leat šaddan vuollánit ođđa ruvke, bieggamillo ja eará sisabahkkemiid vuosttá.
Duorastaga válddii EU ovtta lávkki lagabui ođđa láhkii, mii dagaha ahte ruvkefitnodagaide šadda álkkibut oaččut lobi boahtteáiggis hukset ođđa ruvkkiid dahje rahpat boares ruvkkiid.
Go háliidedje čájehit duhtameahttunvuođa sisabahkkemiid vuosttá de olbmot miehtá riika čoahkkanedje lávvordaga Sergels Torgii Stockholmii.
Earet eará doalai Sáminuora sátnejođiheaddji Sara-Elvira Kuhmunen sártni.
– Mu mielas lea hui dehálaš ahte mii čájehit ahte mii eat dohkket dan mii lea dáhpáhuvvamen Ruoŧas dál, ahte dohkkehit visot sisabahkkemiid, son dadjá.
”Lea jallodat”
Maiddai Tor Tuorda “Gruvfritt Jokkmokk” lei sajis iežas nieiddain Astrid Tuordain guhte lávllui ja juoiggai doppe.
– Dovdo somá leahkit dáppe ja oaččut ođđa olbmuid guldalit muhto seammás eat galggaše dárbbašit leahkit dáppe, son dadja.
– Sisabahkkenmoivi ii sulastahte maidege ieža go borešvuohta, ii leat goassege sáhka unnidit ja ođđasiid geavahit metállaid muhto galgá dušše bilidit luonddu suddjemuša dihte, lea jallodat, dadjá Tor Tuorda.