Aruká Juma vádjolii go oaččui covid-19 dávdda 2021 maid aviisa New York Times fuomášahtii.

Son gullui Amazonas arvemeahci eamiálbmogii lahka Assuajoga Brasilias  ja nu movt olu earát son geavahii čearddas nama iežas goargun.  

Go jámii de dadje ahte son lei maŋemus dievdu čearddas ja orui leahkimen ahte čearda lei jávkagoahtime.

Aruká golbma nieiddas Boreá, Mandei ja Maytas ledje iežá áigumušat.  Mandei Juma šattai vuosttas nissonoaivámuš dan seamma guovllus Amazonasis.

Gilli lea ealáskan

Golbma oappážagat mearridedje náitalit iešguđetge dievdduiguin eará čearddain, ja doalahit iežas álbmoga vuolggasaji. Odne leage gilli ealáskan čájeha AP reportáša.  

– Ii leat goassege ovdal leamaš nissonolmmoš njunnožis, ja de bohte olbmot mu lusa ja lohke “ Don it livčče galgan álgit dasa go leat nison.” 

Juma eamiálbmotguovlu, sullii seamma stuoris go Las Vegas lea boares arvemeahci gokčasa vuolde Amazonasis. Stuorimus vuoruhus lea suddjet sin guovllu lobihis čuollamiidda.  

Ja vaikko vuovdečuollamat leat unnon Amazonasis Luonddugáhttensearvvi vuođul de lea Juma- álbmot aŋkke fuolas.  

 Geahččalit suddjet iežaset   

Suddjendihte iežaset de fáktejit nuorra dievddut guovllu fatnasiin ja geavahit maiddai drönara vai besset vákšut guovlluid mat leat guhkkelis vuovdečuolliid, suollagiid ja guolásteaddjiid vuosttá.  

 – Johka ii dieva šat seamma olu go ovdal ja čáhci ii galggalii goikat ná olu. Lea maiddai olu lieggasit go ovdal. Min ballat manin ná šadda muhto lea čuollamiid dihte, dadjá Mandei Juma ja joatká: 

– Go mii oaidnit ođđa vuovddehuhttima de dovdat morraša go doppe leat čuollan. Muora eallin lea seamma go olbmo eallin. Muoraid čuollat lea dego olbmuid goddit.

Sii leat 24:is álbmogis ja Mandei ballá ahte čearda galgá jávkat go leat beare unnán dievddut.