TikTok lea okta dain bivnnuheamos appain ja das leat badjel golbma miljovnna geavaheaddji duššefal Ruoŧas.
17-jahkásaš Ailie Li Granström almmuha filmmaid ja dat leat veháš iežáláganat, daningo sus lea gákti nalde.
– Lean iežan mielas hui fiinnis gávttiin ja dieđán ahte iežáin maid lea seamma dovdu. Ii leat makkárge treanda, muhto hui lunddolaš munnje, dadjá son.
”In dovdda iežan goassege akto”
Ailie Li muitala ahte su jođihanfápmu almmuhit filmmaid lea ahte eanet sápmelaččat galget oidnot mediain, juoga maid son váillahii unnin.
– Mon dovden iežan nu akto mánnán, go sámi kultuvra ii vuhtton nu ollu mediain. Lea deaŧálaš mu mielas ahte vuosehit sámi kultuvrra ja okta buorre sosiála mediain lea ahte oaidná ollu olbmuid iige dovdda oktovuođa, dadjá son.
Leat dávjá positiivvalaš kommentarat, muhto bohtet maid rasisttalaš- ja vaššikommentarat.
– Eanas áiggi mon vásihan positiivvalaš kommentaraid sápmelaččain ja eamiálbmogiin, muhto de leat gis olbmot geat dadjet feara maid baháid ja dasa ferte measta ráhkkanit vai bastá daid gieđahallat. Mon geahččalan ahte ii jurddašit, in nagot gieđahallat negatiivvlalaš energija, dadjá son.