TikToke lea okta dain bivnnuheamos appain ja das leat badjel golbma miljuvnna geavaheaddji duššefal Ruoŧas.
17-jahkásaš Ailie Li Granström álmmuha filmmaid ja dat leat veaháš earálágánat go dain sus lea gákti nalde.
– Lean iežan mielas hui fiinnis gávttiin ja dieđán ahte earáin lea maid seamma dovdu. Ii leat makkarge treanda, muhto hui lunddolaš munnje, dadjá son.
”In dovdda iežan goassege okto”
Ailie Li muitala ahte su jođihanfápmu almmuhit filmmaid lea ahte eanet sápmelaččat galget oidnot mediain, juoga maid son váillahii unnin.
-Mon dovden iežan nu okto dalle go sámi kultuvra ii vuhtton nu ollu mediain. Lea deaŧálaš mu mielas ahte čájehit dan ja okta buorre sosiala mediain lea ahte oaidná ollu olbmuid ja ii ge dovdda oktovuođa, dadjá son.
Leat dávjá positiivvalaš kommentarat, muhto bohtet maid rasisttalaš- ja váššikommentrat.
-Eanas áiggi mon vásihan positivvalaš kommentaraid sápmelaččain ja eamiálbmogiin, muhto de leat gis olbmot geat dadjet feara maid baháid ja dasa ferte measta ráhkkanit vai bastá daid gieđahallat. Mon geahččalan ahte ii jurddašit, in nagot gieđahallat negativvlalaš energija, dadjá son.