Mannan vahku lágiduvvui maiddái borramuškonferánsa Ubmejen Biejvieh olis. Doppe deaivvadedje earret iežá borramušbuvttadeaddjit ja gielddaid ja regiovnnaid ovddasteaddjit.
Sii digaštalle earret iežá heahtegearggusvuođa. Dikšun- ja fuolahanbálvalussii ferte leat biebmu jus šattale stuora heahtedilli dahje buollálii soahti. Máŋgga gielddas eai dieđe mot galget oažžut biepmu jus šaddá dárbu.
”Jierpmálaš geahččanguovlu”
Boazoealáhusas leat guhká dárjon iežaset veahki jus šaddá heahtedilli, dárjon iežaset leat oassin heahtegearggusvuođas. Vualtjeren tjïelte liikoi dan jurdagii ja vuolláičálii šiehtadusa čearuiguin Vilhelmina norra ja södra diibmá.
Sámedikki ealáhuslávdegotti áirras Nils Johan Labba háliida ahte eanet čearut dahket dan seamma go Vualtjeren tjïelte.
– Lea jierpámlaš geahččanguovlu ávkkástallat bohccobierggu ja oaidnit dan stuora oassin Norrbottena ja Västerbottena siseatnama heahtegearggusvuođas. Bohccobiergu lea oláhanmuttus dáin guovlluin, son dadjá.
Vaikko boazoealáhus ii buvttat eanemus bierggu Ruŧŧii, de cealká Labba ahte dáidá leat stuorimus biergobuvttadeaddji máŋgga sajis Västerbottena ja Norrbottena siseatnamis.
”Berre mannat jođánit ”
Västerbottena leanašibitdoavttir Annelie Grip Hansson lea ovtta oaivilis Nils Johan Labbain. Maiddái son oaidná buriid beliid jus boazoealáhus šattalii oassin heahtegearggusvuođas.
– Min leanas lea borramušheahtegearggusvuohta hui heajos dásis, ja mii berret ávkkástallat resurssaid mat mis leat dáppe ja dan fertet jođánit dahkat, dadjá Västerbottena leanašibitdoavttir Annelie Grip Hansson.