Ovdalaš dán jagi lágiduvvojedje Rally Sweden -gilvvut Ubmis ja dalle lágideaddjit eai váldán vuhtii čearu oainnuid. Vaikko ledje lohpidan ahte eai galgan, de lágidedje rally dakkár sajiin gos Ran čearus ledje bohccot.
Beare moadde vahku maŋŋel plánejit MM-skohtergilvvuid Fällforsenii Västerbottenis. Dál ballet seamma dáhpáhuvvat go Rally Swedena lágideami olis.
Lágiduvvojit juste ovdal guottetáiggi
Cuoŋománu 11. ja 12. beaivvi lágiduvvojit MM-skohtergilvvut Fällforsenis Västerbottenis. Dát leat maŋŋit jagis go veardida ovddit jagiid – ja veaháš ovdal guottetáiggi.
– Mii eat moaitte ieš daid gilvvuid, muhto go gilvvut lágiduvvojot juste dien áiggis de šaddet váttisvuođat, dadjá Semisjaur Njarg čearu ságadoalli Anders Erling Fjällås.
Eai oaččo vástádusa lágideddjiin
Son oaivvilda ahte čearru oaččui menddo maŋŋit dieđu goas ja gos gilvvut galget dollojuvvot. Jus diehtu livččii boahtán árabut, de sii livčče sáhttán plánet ahte eai buvtte ealuset dan guvlui. Dál sii geahččalit darvehit lágideddjiid ságaide digaštallat ášši, muhto eai leat vel lihkostuvvan.
– Mii háliidit duššefal gullat movt lágideaddjit galget vuhtiiváldit boazodoalu ja movt mii sáhttit ovttasbargat dáid beaivemeriid garvin dihte váttisvuođaid, muhto mii eat lea ožžon makkárge vástádusa, dadjá Anders Erling Fjällås
Maiddai SVT Sápmi lea ohcan lágideaddji ságaide, muhto eai leat lihkostuvvan.