Skovvi lea jorgaluvvon máŋggaid gielaide, nu maiddái davvisámegillii. Muhto dehálaš diehtu das lea oalát boastut. Ruoŧagiel veršuvnnas čállo ná ”Alla uppgifter om att motståndet ska upphöra är falska”, ja sámegiel veršuvnnas dat lea jorgaluvvon ná: ”Buot dieđut ahte vuosttildeapmi galgá heaitit lea duohta”. Jur nuppeládje.
Ulla-Karin Sarri, Sámedikki giellalávdegotti ságadoalli oaidná dán hui duođalažžan.
- Dat lea hui duođálaš sivva, erenomažit go lea sáhka dieđuin mat bohte ráđđehusas ja eiseválddiin, dadjá son Sámerádioi.
SVT Sápmi ja Sámirádio leat ohcan Servvodat – ja gearggusvuođaeiseválddi, muhto eat leat vel ožžon vástadusa sis.
– Dát vuoseha man dehálaš dat lea ahte mis leat eanet jorgaleaddjit ja dulkkat sámegielain vai sáhttá korrektuvralohkat. Dat lea álo buorre jus soames iežá korrektuvralohká go son gii lea jorgalan, dadjá Ulla-Karin Sarri.
Iežá boastoovdamearkkat kriisaskovis leat go ruoŧagielas lea čállon ná: ”Om du hör signalen: gå inomhus, stäng fönster, dörrar och ventilation och lyssna på Sveriges Radio P4”, de lea jorgaluvvon davvisámegiellii: ”Jus gulat jiena, mana olggos, steηge láse, uvssaid ja ventilašuvnna ja guldal Sveriges Radio P4”.
Ja ”Militära angrepp, exempelvis flyganfall, robotattacker eller andra krigshandlingar” lea jorgaluvvon ”Militeara rohkkáheamit, omd. girdirohkkáheamit, robohttafalleheamit dehe eará riikkaáššebáhpirat”.