Per Elof Nilsson Ricklund lea málen mánnávuođa rájes ja lea goalmmat buolvva dáiddár. Dál son lea áigeguovdil ”Bortom fjällen” čájáhusain Girona dáiddahállas Gironastipendiáhta oktavuođas.
– Dat lea gudni beassat doallat čájáhusa dáppe Gironis. Diibma mus lei čájáhus Johkamohkis ja in jáhkkán ahte galgen vel davvelii, muhto dáppe lean dál, son dadjá.
Muitala govaiguin
Dáidda lea su vuohki muitalit. Čájáhusa dáidagiiguin son lea bargán máŋggaid jagiid ja son oaidna daid dego iežas románat, dego ráidu.
– Dat lea čoakkalmas mu duottargovaid birra. Dat lea buorre forume munnje gos beasan leahkit diehtoáŋgir, dutkat ja ohcat duohtavuođa ja máhtu ja dan proseassa oaidna mu govain, son dadjá.
Muitaleapmi govvahámis lea álo leamašan dehálaš Per Elofii. Go son álggii dáidagin dat šattái guovddaš oassi ahte gávdnat juoga lágan rukses árppu ja de gávdnat metafora dan muitalussii govas.
”Mii lea vákki duohken?”
Son gohčoda čájáhusa ”Bortom fjällen”.
– Dat lea juoga erenomáš vánddardit duoddaris ja oaidnit mii vákki duohken lea, maid doppe gávdna? Dat lea rabás fádda munnje ahte ohcat mii metaforalaččaid gávdno duoddariid duohken, son dadjá.
Go doalla čájáhusa de bovde sisa ságastallamiidda olbmuid gaskan.
Per Elof dadjá ahte lea miellagiddevaš gullat maid earát lohket su govaid birra.
– Don šattát dego olmmoš go vásihat iežát govaid eará olbmuid čalmmiid bokte, son dadjá.
Gielda oastá dáidaga
Gironstipendiáhta lea geigeuvvon 1959 rájes dan ulbmilin ahte dahkát Girona dovddusin dáiddariid gaskas.
Gironstipendiáhtta addá sunnje 30 000 ruvdnu ja dasá lassin áigo gielda oastit sus govaid.
– Mii eat leat vel geargan humadit man dáidaga sin osttet, dadjá son.
Čájáhus bisttá gitta Golggotmánu 31 beaivvi rádjái.