Jos galgá sáhttit doaimmahit skuvlla mii olaha oahpahusplána de oahppit dárbbašit skuvlaoappáid ja skuvlavieljaid. Dearnna sámeskuvllas leat leamašan unnán oahppit máŋggaid jagiid ja dála dilis eai boađe ođđa oahppit lagamuš jagiid.
Danin lea Sámeskuvlastivrra lávdegoddi mearridan ahte sii bissehit doaimma Dearnna sámeskuvllas dán čavčča rájes.
Ii soaba doaimmahit skuvlla
Juovlamánus 2024 oaččui lávdegoddi čilgehusa sámeskuvlla dili birra ja skuvlahoavda oaččui bargogohččuma iskkat ášši.
Iskamuš čájehii ahte ii soaba doaimmahit skuvlla jos eai leat oahppit ja mearrádus skuvlla boahtteáiggi birra fertii váldot.
Leat ráhkadan riskaárvvoštallama, doaibmaplána ja sierra árvvoštallama mánáidrivttiid geahččanguovllus mánáidkonvenšuvnna artihkal 2, 3, 6, 12 ja 30 jelgii.
Mearrádusa sáhttá ođđasit árvvoštallat
Naestie ovdaskuvla ja gáiddusoahpahus jotket sin doaimmaid sámeskuvlla lanjain.
Lávdegoddi mearridii maid ahte galget čuovvut ovdáneami Dearnnas ja jahkásaččat čuovvolit galle mánát ja oahppit doppe leat. Sii mearridedje maid ahte lávdegoddi galgá árvvoštallat mearrádusa ođđasit jos oahppiid lohku lassána ja jos lea vejolašvuohta doallat oktasaš oahpahusa.