Mannan geasi bissehuvvui sámi rihppaskuvlaleaira dan dihte go bohte moaitámušat earret eará vánhemiin.
Dán geasi leaira leai Saadteskenjuana ja leairaárvvoštallan lea dál válmmas.
– Lea obbalaččat hirbmat positiivvalaš árvvoštallan vaikko mii leat ožžon ollu rávvagiid mat leat buorit boahttevuođas, dadjá Sofia Strinnholm.
Visot oasseváldit leat vástidan muhto eai visot vánhemat. Sofia Strinnholm dulko goit dán positiivvalaččat.
– Loahppa bođus goitge čájeha ahte leat oalle duhtavaččat. Jus olmmoš lea duhtameahttun de gal deavdá árvvoštallanskovi, son dadjá.
”Čielga giellaovdánahttinplána”
Loahpparaporta galgá leahkit vuođđun boahtte leairra plánemis. Dalle váldet vuhtii ákkaid veagain, vánhemiin, nuorain ja iežáin.
– Gávdno maid hui čielga plána giellaovdáneamis. Mon lean hui duhtavaš dán jagáš barggus juste dainna, dadjá Sofia Strinnholm.
Dál leat álggaheami plánet boahtte geasi leairra ja maid 2026 leairra.
– Lea hástalus gávdnat leairadálu mas leat oađđensajit, stuora feastalatnja ja stuora saddjás girku vai eat dárbbš bidjat oasseváldinmeari, muitala Sofia Strinnholm.
”Molsot rihppabeaivvi”
Boahtte jagi lea leaira Saadteskenjuana, Västerbottenis ja rihpat leat, dego dán jagi, Stensele girkus. Muhto dahket muhtin rievdadusaid.
– Mánnodaga maŋŋel mihcamáraid lea feastaborramuš ja distaga lea rihppabeaivi, dadjá Sofia Strinnholm ja joatká:
– Mii leat vuhtiiváldán sin geat leat máidnon ahte miessemearkuma dihte šaddá menddo maŋŋit mihcamáraid maŋŋel. Rihppabeaivi ii sáhte leahkit mihcamáraid ja mii fertet de geahččalit doallat dan daid vuosttaš árgabeivviid maŋŋel mihcamáraid. Mii fertet de árvvoštallat movt dat de doaibmá, dadjá son.
Boahtte jagaš leaira álgá geassemánu 10 beaivvi gitta geassemánu 23 beaivái ja loahpahuvvo rihppabeivviin geassemánu 24 beaivvi.
Ohcamuš boahtte jagi leirii rahppui disdaga sidjiide geat lea riegádan 2010 ja/vai gerget 8:at luohká giđđalohkanbaji 2025:s . Ohcamuš lea rabas gitta čakčamánu 27 beaivvi 2024.
