Mannan vahku ledje Vierme K, Såhkie – Upmi s\ámesearvi, Kulturráđi, Upmi gieldda, Region Västerbottena ja Arctc Arts Sekretariate ovddasteaddjit Ottawas Kanadas.
Sii serve allamenolaš doaluide mas lágidanbargu addojuvvoi viidásit. Konferánsa lágiduvvui Ottawas 2022:s.
Geasset 2026 lágiduvvo konferánsa Upmis.
”Lea sáhka albma fátmmasteamis”
Sápmelaččat leat álggahan barggu oažžut konferánssa Ubmái ja Vierme K lea čađahan ovdaguorahallama mii lea vuođđun álggahanbargui.
– Arctic Arts Summit álggahuvvoi čalmmustahttin dihte daid eavttuid, hástalusaid ja vejolašvuođaid mat leat arktalaš guovllu kultuvrrain, dadjá Jerker Bexelius.
Son joatká:
– Eamiálbmogiidda lea albma fátmmasteapmi dehálaš – iige beare oassin ságastallamis, muhto háliidit leat čielga aktevrrat ja mearrideaddjit.
Sávvet oažžut 600 oasseváldi
Kanadai čoahkkanedje 400 oasseváldi. Lágideaddjit sávvet ahte sáhttet váldit vuostá 600 olbmo sihke Ruoŧas, Norggas, Suomas, Amerihkás, Kanadas, Islánddas ja Ruonáeatnamis eret.
– Lea dehálaš oažžut oktasaš arktalaš diskurssa vai stáđisvuohta nannejuvvo, ja čoahkkimis deattuhuvvo arktalaš našuvnnaid lassánan ovttasbargu, dadjá Arctic Arts Summit vuođđudeaddji Maria Utsi.
Upmi sámi vahku olis lágiduvvo diehtojuohkindeaivvadeapmi čoahkkima birra. Deaivvadeapmi lea duorastaga Upmi Folkets husen Miklagårdenis.
ARCTIC ARTS SUMMIT
Norgga beale Festspillene álggahedje Arctic Arts Summit -konferánssa 2017:s. Konferánsa lea lávdi kulturpolitihkalaš áššiid várás mat leat sirkumpolára guovllus.
Čoahkkin Upmis lea njealját čoahkkin:
2017: Norga. Norgga Kulturdepartemeantta lágidii Arctic Arts Summit ovttas Festspilleniiguin Davvi-Norggas (Arctic Arts Festival).
2019: Suopma. Suoma oahppo- ja kulturdepartemeantta, Arts Promotion Centre Finland (Taike) ja Lappland universiteahtta lágidedje konferánssa.
2022: Kanada. Lágiduvvoi Whitehorses Yukonis ja The Canada Council for the Arts lagidii dan ovttas Government of Yukonis. Arctic Arts Youth Summit ovdanbuktojuvvoi ja lea dál oassin konferánssas.