Stäng
Sápmi
Liigeruđat mannet doaimmaide mat nannejit kultuvrra ja ođđa čájálmasaide, dadjá teáhterhoavda Åsa Simma. Foto: TT

Giron Sámi Teáhter oažžu eanet ruđa

Publicerad

Giron Sámi Teáhter oažžu eanet ruđa. Ráđđehus lea mearridan juolludit guokte miljovnna ruvnno 2025:s.
– Dál beassat bargat maid háliidit eatge dárbbaš loattaid vuovdit vai oažžut ruđa, dadjá teáhterhoavda Åsa Simma.

Ráđđehus mearridii duorastaga ahte Giron Sámi Teáhter oažžu guokte miljovnna ruvnno liigeruhtan 2025:s.

Liigeruhta addo dainna ulbmilin ahte teáhter galgá nannet ja ovddidit iežaset riikkaviidosaš doaimma.

Nannet eavttuid
Liigeruđain vurdojuvvo ahte sámi dáiddálaš ovdáneami eavttut nannejuvvojit ja máhttu sámi eallimis, gielas ja kultuvrras loktejuvvo.

Davvisámegiella

Giron Sámi Teáhtera bargu lea buvttadit ámmátlaš lávdedáidaga man vuođđun lea sámi kultuvra ja maiddái loktet sámegielaid. Juohke jagi buvttadit guokte dahje golbma iežas teáhterbihtá mat leat mánáid, nuoraid, rávisolbmuid ja vuorrasiid váste.

– Mis lea čájálmas boahtte čavčča mii lea vástádus Ruoŧa girku ándagassii átnumii maid sii leat bivdán sápmelaččain. Jearaldat lea: Sáhttágo addit ándagassii visot vearrivuođaide maid girku lea dovddastan dahkan, dadjá teáhterhoavda Åsa Simma.

Vuosttaš geardde ealli musihkka
Liigeruhta addá Giron Sámi Teáhterii vejolašvuođa atnit ealli musihka čájálmasas.

Ruđat galget maiddái adnot doaimmaide mat nannejit kultuvrra.

– Sámi vahku olis, njukčamánu álggus, mis galgá leat kulturpolitihkalaš seminára Upmis, dadjá Åsa Simma.

Mannan čavčča bušeahttaproposišuvnnas ráđđehus dieđihii ahte Giron Sámi Teáhter oažžu guokte miljovnna ruvnno liigeruhtan boahttevaš golbma jagi. Boahtte máksin lea 2026:s.

Relaterat

Så arbetar vi

SVT:s nyheter ska stå för saklighet och opartiskhet. Det vi publicerar ska vara sant och relevant. Vid akuta nyhetslägen kan det vara svårt att få alla fakta bekräftade, då ska vi berätta vad vi vet – och inte vet. Läs mer om hur vi arbetar.

Davvisámegiella

Mer i ämnet