Dán vahku lágidit rally-MM mehciin olggobealde Upmi. Lea leamaš garra digáštallan gos galget vuodjit dan dihte go sápmelaččain leat bohccot rittus. Mannan duorastaga váiddii Ran čearru lobiid golbma dain vuodjingaskkain.
Čearu stivralahttu Maidi Eira Andersson laktá dakkaviđe dán golbma bohcco goddima Kullaskogenis, rallydigástallamii ja čearu váidimii.
– Lea issoras go olbmot sáhttet dákkáriid dahkat rally dihte. In leat goassege vásihan dákkár vaši Ran čearu vuostá.
”Eai leat lunddolaččat jápmán”
Boazovázzis Johan Anderssonis lea váivi ja son lea vuollánan go SVT deaivvada suinna meahcceluotta alde jápma bohccuid luhtte sotnabeaieahkeda. Guovtti bohccos leat botken čoddagiid ja goalmmát boazu orru báhččon.
– Mun oainnán ahte bohccos lea luođđaráigi ja ahte ii leat lunddolaččat jápmán, iige leat boraspiire ge goddán, nu mun árvvoštalan. Mu mielas lea surgat ahte dákkárat dáhpáhuvvet.
Son lei máŋga diimmu čužžon meahcis vuorddašan poliissaid boahtit dutkat báikki.
– In sáhte vuolgit gosage ovdal poliissat bohtet daningo oainnán dán rihkusbáikin. Mus eai leat sánit. Eai juste dál, dadjá Johan Andersson.
Poliissat ohcet duođaštusaid beatnagiiguin
Poliissat dieđihedje eahkesbeaivvi ahte sii dál leat dutkame rihkusdagu ja leat jearahallame olbmuid, ja dutket maiddái rihkusbáikki earret iežá beatnagiiguin mat galget sihkarastit duođaštusaid. Dás várohit dovdameahttun vearredahkki lobihemiid goddán bohccuid ja danin galget ilmmuhit bahádagu, čállet poliissat iežaset ruovttosiiddus.
– Dát leat ođđa dieđut midjiide. Mii eat dohkket makkárge vašiid eatge áitagiid. Lea issoras ahte dát lea dáhpáhuvvan ja mun sávan ahte poliissat dutket dán, dadjá MM-rally lágidandirektevra Erik Åström.