Melodiijafestiválas lávvardaga lávlu Jon Henrik Fjällgren, Arc North:in ja Adam Woodsain vuosttasin loahppagilvvuin.   

Sii vuite oassegilvvu ja ožžo eanemus jienaid dan lávvardaga. Speallanfinodagat einnostit ahte šaddet vihtta buoremusaid searvái lávvardaga.   

Galggašii gáddet ahte dat manašii bures singuin. Muhto dat ii leat Ruoŧa Rádio guldaleaddjiid oaidnu. Dat bidje su B-listui ja iige čuojahuvvo nu dávjá go eará lávlagat, mat manne njuolgga loahppagilvui.   

– Dát ii leat riekta, manin sámi musihka ii galgga gullot rádios? Leat ollu musihkkasuorggit mat čuojahuvvojit rádios – manne luohti ii čuojahuvvo, imašta Fjällgren.  

”Sávvá buohkaid oaidnit”  

Fjällgren lea behtohallan Ruoŧa Rádioi. Dat eai beroš máŋggabealatvuođas ja su mielas eanet olbmot galget dovdat oassin das. Ii dušše son, muhto maiddái sámi musihkkáratge.  

– Mun lean hárjánan dása.  Dán lean vásihan ovdalge Melodiijafestivála oktavuođas, muhto maiddái muđuige iežan musihka ektui, muitala Jon Henrik Fjällgren.  

Sus lea ávžžuhus Ruoŧa Rádioi.   

– Mun sávan ahte oaidnibehtet buot olbmuid, dadjá Jon Henrik Fjällgren.  

SR: Eat sáhte vuoruhit Fjällgrena  

Go SVT Sápmi jearahalai Ruoŧa Rádio musihkkaválljenhoavdda Jonas Westman mannan vahkus, de su mielas ii lean dát váttisvuohta  

Su dieđuid mielde ii leat musihkkabuvttadeaddjiid mielas Fjällgrena lávlla seamma buorre go dat eará loahppagilvovuoiti lávlagat.   

– Mii eat sáhte vuoruhit Jon Henrika lávlaga go dat lea sámi lávlla, dajai son SVT Sápmái.