Sámedikki stivrra evttohus ahte buot sámit galget sáhttit gullot soames čerrui manai čađa dievasčoahkkimis guovvamánus.
Opposišvuvnna bellodagat vuosttildedje dan ja oaivildedje ahte evttohus rihkko álgoálbmot rievtti.
”Čearut eai háliit dan”
Láidunlávdegoddi lea iskkan evttohusa ja čállá promemorias ahte čearut eai háliit dan ja dat sáhttá rihkkut dálá miellahttuid rivttiid.
Håkan Jonsson, Sámedikki stivraságadoalli, ii leat duhtavaš Láidunlávdegotti vástádusain.
– Jos geahčča PM 48 ja 49 de čuovvulit otna boazodoallolága ja dat láhka lea nállebiologalaš historjja árbi mii lea vealahan sámiid olggobealde čearuid badjel 100 jagi, dadjá Jonsson ja joatka:
– Danin lea áigi ahte Ruoŧŧa dovddasta iežas kolonialalaš historjjá ja geahčča bearrai ahte šadda njuolga. Buot sámiin galgá leahkit riekti eatnamiidda ja čazadagaide, ii dušše sidjiide geat barget bohccuiguin, son dadjá.
Váikkuha ovddosguvlui
Jonsson oaivvilda ahte lea dehálaš ášši mii sáhttá váikkuhit máŋga jagiid ovddosguvlui.
– Dat lea nu dehálaš ášši sámi álbmogii. Dat lea dan birra ahte sáhttit joatkit doalahit ja ovddidit sámi kultuvrra mii duođas lea vuođđoduvvon oktagas olbmo dásis. Dat girjáivuohta mii gávdno lea issoras dehálaš dasa ahte min álbmot galgá ain gávdnot 100 jagi geažis, son dadjá.
SVT Sápmi ohcca Láidunlávdegotti ságadoalli Eric M Runesson.
Videos badjin čilge Håkan Jonsson moaitaga Láidunlávdegotti vuostá.