Sámediggeválggat leat miessemánu 18. beaivvi. Novusa maŋŋemus iskkadeapmi, maid sii leat dahkan Sámeradioi ja SVT Sápmái, čájeha ahte jus dál livčči válggat de guđás logis jienastivččii soames bellodaga stivraovttastusas, Jakt och fiske samerna, Vuovdega ja Landspartiet Svenska Samerna. Ovddit válggaid ožžo sii 53,7 proseanta jienain, dál livčči vel eanet jienat.

– Diehttelas lea dát illudahtti, livčči vearrát jus beare njealljis logis jienastivččii stivrrraovttastusa. Dát movttidahtta olbmo, dadjá sámedikki stivraságadoalli Håkan Jonsson (JoF).

”Oalle nanu jienasteaddjilohku”

Viidaseappot son čilge manin son jáhkka ahte sii leat nu ovdánan.

-Mis lea dieđusge oalle nanu jienasteaddjilohku, muhto mon jáhkán maid ahte mii leat lihkostuvván dieđihit jienasteaddjiide min politihka. Dat lea hui dehálaš bealli ja Vuovdegis ja LPSS:as leat maid čielga bellodatprográmmat ja dat mielddisbuktá ahte jienasteaddjiin lea álkibut válljet daid bellodagaid.

Novus-iskkadeapmi čájeha ahte sulli njealjis logis jienastivččii Jakt- och fiskesamerna, mii lea lasahus ovddit válggaid ektui go dalle ožžo 37,6 proseanta jienain.

– Dieđusge mon hirpmástuvan. Mii oaččuiime ollu jienaid maŋŋemus válggaid ja dál mon illudan ja seammas hirpmástuvan go mis leat vel eanet jienasteaddjit dál. Mon jáhkken ahte gal mii dál juo leat dan rájis maid sámedikkibellodat sáhttá oláhit, dadjá Jonsson.

”Eai leat dahkan buori barggu”

Sámiid Riikabellodat lea hipmástuvvan daidda maŋŋemus loguide.

– Lea imaš go mon oaivvildan ahte Jakt- och fiskesamerna eai leat dahkan buori barggu dán mandáhttaáigodaga go eai leat lihkostuvvan máŋggain áššiiguin. Sii eai leat bálljo searvan riikaidgaskasaš bargguide ja dan stivrra maid Håkan Jonsson láidesta leat dagahan ahte mii eat beasa bargat dujiin ja oahpahusain go ii gávdno makkarge bargogohččun eiseválddis, dadjá Paulus Kuoljok, várreságadoalli Sámiid Riikabellodagas.