Nubbi háliida leahkit moallavákta ja nubbi fas olgospealli muđui sudnos leat seammalágánat ulbmilat. Soai galgaba šaddat buot buoremus. Julia ja Sofia leaba 12- jahkásačča ja leaba hárjehallan speallat hockey dan rájes go leigga 6.
– Ii gávdno mihkke mii lea heittot hockeyn, visot lea somá, dadjá Julia Gunillason Påve ja Sofia lea ovttaoaivilis.
– Mun hal lean moallavákta, nu ahte somámus lea darvehit váttes skoahtaid.
Váttes álgu jumežagaide
Ahte Julia ja Sofia galggaiga valáštallat ii lean álot nu diehttelas. Soai riegádeigga máŋga mánu beare ovdal ja dettiiga dušše gilo – ovttas. Julia veallái respiratoris mánnoviissaid ovdal go nieiddaguovttos beasaiga vuolgit ruoktot veaga lusa. Muhto dát ii leat bissehan sudno, ja dan rájes ii leat nákca ja miella goassege váilon.
– Mun bážán 100 gitta 200 skoahtaid moala vuosttá juohke beaivvi. Gullen ahte buoremus speallit dahket dan, de mun nai dagan dan, muitala Julia. Somámus mii gávdno lea báhčit stráffa.
PWHL ja OS
Soai hárjehallaba golbma gitta njeallje geardde vahkkus ja báhciba skoahtaid juohke beaivvi, visot vai olaheaba gait bajimussii. Sudno idolat leaba Sara Gran ja Emma Nordin Luleå MMSK:as ja stuorimus niehku lea beassat ameriika hockeyjovkui PWHL.
– Muhto OS livččii maid leamaš somá, ja háliidan speallat Sofian maid, dadjá Julia geas lea ulbmil šaddat olgospealli.
Gula eanet nieiddaguvtteža hockeyniegu birra videos!