Sámiid duohtavuođakommišuvnnas ii leat vel sátnejođiheaddji maŋŋel go ovddit heittii mannan čavčča.
Ráđđehus evttohii easká ládje nama Sámedikki stivrajovkkui. SVT Sápmi vásiha ahte potentiála sátnejođiheaddji bovttii garra digáštallama stivrajoavkkus ovdal go soabadedeje ahte ii dohkehit dan.
– Mii oaivvildit ahte evttohuvvon olmmoš ii deavdde gáibádusaid. Danin mii leimmet hui ovtta oaivilis stivrajoavkkus, dadjá Håkan Jonsson (JoF).
Sámedikki ja ráđđehusa gáibádusat leat earret eará ahte sátnejođiheaddjis galgá leat gelbbolašvuohta sihke juridihkas ja sámi ealáhusain ja kultuvrras.
”Ii leat doaimmahan barggus”
Nils-Jonan Labba (Guovssonásti), maid stivrajoavkolahttu, moaitá garrasit Kulturdepartemeantta.
– Orru nu ahte sii eai leat doaimmahan iežaset barggu dahje de sis lea iežas plána maid čuvvot, dajdá son.
Son oaivvilda ahte ii sáhte duohtanváldit Kulturdepartemeantta evttohusa. Dasa lassin son vel imaštallá manin departemeanta dušše evttoha ovtta nama eaige digáštala stivrajoavkkuin eará vejolaš evttohasaid.
– Mon vurden goit ahte stivrajoavku oažžu guokte dahje golbma nammaevttohusa gean gaskka sáhttá válljet. De mii livččiimet ovttas Kulturdepartemeanttain humádan guhte sis lea heivvolaš sátnejođiheaddji.
Son joatká:
– Dát lea imašlaš bargovuohki. Dat leat sii geat stivrejit ja dan sii eai hálit addit earáide.
Eahpečielggas movt ráđđehus dál dahká
SVT Sápmi lea ohcán kultur- ja sámeministara Parisa Linjestrand ságaide, muhto son ii leat vel kommenteren ášši.
Lea eahpečielggas mii dál dáhpáhuvvá. Ráđđehus sáhtta joatkit bargat dáinna evttohuvvon namain vaikko Sámediggi ii mieđit dasa. Håkan Jonsson ii jáhke nu šaddat.
Jus kommišuvnnas galgá oažžut luohtevašvuođa, de ferte Sámedikki stivrajoavku dohkkehit dan, dadjá son.