Okta dain golmma bohccos lei Eira-Anderssona maid gávdne jápmán várohuvvon vaššerihkkumis Ran čearu vuostá. Maŋŋelaš leavai filbma sosiála mediain mas oaidná go soamis vuodjá bohccuid njeaiga ja boagusta,
Dát dáhpáhuvai juste dakkár áiggis go Ran čearru vásihii ollu vaši daningo dáistaledje ja geahččaledje bissehit Rally Swedena lágidit rally gasku guohtuneatnamiid.
Roavis ja surgat
Dát lei beare oasáš vašis maid čearru lea šaddan vásihit – vaikko dál lei vašši mihá vearrát go ovdal.
– Dákkár roavva ja surgadis vaši eat leat vel vásihan, dadjá Maidi Eira-Andersson.
Son joatká:
– Lea čuohcan juohkeoktii mis. Falleheapmi lei meidnejuvvon Ran čerrui. Boazu lea min geađgejuolgi, olles min kultuvra ja deháleamos mii mis lea.
Buohkat eai leat vašuhan čearu. Čearru lea ožžon ollu doarjaga sosiála mediain go olbmot leat atnán hashtagga #renkärlek almmudettiin govaideaset.
Háliida gulahallama
Eira-Andersson deattuha ahte lea ožžon fámu dán doarjagis. Sosiála mediain leat maiddái addán oalát iežá gova das mii lea dáhpáhuvvan.
– Máŋgasis rahpasedje čalmmit go oidne man surgat lea. Nubbi bealli ges bidjá sága mannat ahte mii leat ieža goddán bohccuid, namalassii ahte mii leat bivdán dán dáhpáhuvvat bissehan dihte rally, ráhkadan dihte riiddu ja vai oažžut ruđa, son dadjá.
Son sávvá ahte dáhpáhusas lihkká boahtá juoga buorre.
– Sávan ahte gávdnet sivalačča poliisaguorahallama bokte. Mun sávan ahte oažžut buori gulahallama dán ášši iežá beliiguin vai sii ipmirdit man surgat dát lea leamaš midjiide. Mii dárbbašit rievdadusaid vai dát ii dáhpáhuva nuppes.
Poliissat leat almmuhan ahte dievdoolmmoš várohuvvo roavvát biinnidan ja vahágahttán elliid, muhto eai leat vel áššáskuhttán su.