Turisma Kalaallit Nunaatas lassána go ođđa riikkaidgaskasaš girdišilju rahpá vejolašvuođaid mat eai leat gávdnon ovdal. Turisma ovdáneapmi jáhkket leahkit mearrideaddji vai Kalaallit Nunaata ii dárbbaš leahkit sorjavaš Dánmárkku ruhtadeamis.
”Rámálmas luondu”
Casper Frank Møller, Isak Brandt Hansen ja Rasmus Brandt leat muhtumat geat leat bohtan ruovttoluotta Kalaallit Nunaatai jođihandihte fitnodagaid.
– Ahte beassat čájehit dán rámálmas luonddu olles máilbmái lea čatnon rámisvuhtii, dadjá Casper Frank Møller, Raw Arctica mielaálggaheaddji.
Turistafitnodat álggahuvvui golbma jagi áigi ja Møller vásiha ahte eai gilval iežá fitnodagaiguin, muhto veahkehit guhtet guimmiid.
– Go geahččá olles riikka de ii leat nu kapitalisttalaš go guovdilastin lea ovttasbargui, ovttaseallimii ja loktet olles servvodaga. Danin turismmas manná nu bures Kalaallit Nunatas, dadjá son.
Go ealáhus ovdána johtilit de háliidit bidjat meriid movt jođiha turistafitnodaga Kalaallit Nunaata guovlluássiiguin.
– Leat báikkálaš operatevrrat geat leat dagahan ahte mis manná nu bures. Mii háliidit leahkit ambassadevrrat dan ovddas movt fitnodatjođiheapmi sáhttá leahkit go dan dahká čorgadis málliin, dadjá Møller.
”Galgá doaibmat guhkit áigái”
Kalaallit Nuunata lea ožžon olu fuomášumi maŋemus jagiid olu ákkaid geažil. Go jiehkit suddet de lea máilbmi fuomašan roggat minerálaid sullos ja Donald Trump lea cealkán ahte sullo lea sihkkarvuođapolitihkalaš beroštupmi mii lea dagahan ahte amerihkálaččat leat čoahkkanan sullui.
– Mii bargat dan ovddas ahte turisma šaddá guoddinealáhus min ekonomiijai vejolaš minerálaroggama ja guolásteami bálddas, dadjá Isak Brandt Hansen, fitnodaga mielaálggaheaddji.
Muhto gávdno šurru ahte riikka ovdáneapmi ii váldde vuhtii kultuvrra, giela ja demografiija oarjemáilmmi málliid jelgii, juoga masa fitnodat háliida bidjat fuomášumi.
– Mii bidjat fuomášumi seailluhit luonddu, kultuvrralaš čanastupmái ja bistevašvuhtii, no ahte doaibma guhkit áigái, dadjá Møller.