– Dat dovdu nu somá, dovdu olles mu gorudis, dadjá Ánndaris Rimpi.

Ánndaris Rimpi bargá SVT Sápmi reporttarin Göteborggas ja bukta ođđasiid dieppil sihke davviriikkalaš Ođđasat-sáddagii ja SVT Sápmi webbai.

– Mon barggan musihkain ja gielain dan dihte ahte háledan addit sámegiela vuosttaš giellan mu bárdnái. Sámegiella ii gullo Göteborggas ja dat lea stuora bargu oahppat giela. Dovdu dego livččen vustui vázzime olles áiggi. Dát kulturbálkkašupmi mearkkaša hui olu munnje, dat lea duođaštus dasa ahte mu rahčamušas lea áhpu iežá olbmuide nai, ii beare alccen, dadjá Ánndaris.

Bálkkašupmi galggai juhkojuvvot Johkamohki márkana oktavuođas muhto go dat ii šattá koronaleavvama dihte, de lea Ánndaris juo gávnnadan JulevSámega searvvi ságadoalliin Mats Sandströmain ja ožžon diploma ja 5000 ruvnnu.

Maid don galggat dahkat ruđain?

– Munnje lea dat kulturbálkkašupmi gait deháleamos ja diehttelas geavahan ruđaid mátkkoštit ruoktut Oalloluktii ja Sápmái, boagusta Ánndaris Rimpi.

Bálkkašupmi lea 5 000 ruvnnu ja juhkojuvvo dal viđát geardde. Ulbmil dáinna bálkkašumiin lea čalmmostahttit ja doarjut sin geat barget ja nannejit julevsámegiela identitehta, kultuvrra ja ealáhusaid.