90-logus leigga Hannah ja Magdalena Graaf dovddus modeallat ja artisttat ja dan rájis leaba girjji čállán, bloggen ja oassálastan máŋgga TV-prográmmain.
Dál soai leaba áigeguovdilat UR-ráiddus ”Typihkalaš sápmelaččat” mas soai dutkaba sudno sámi duogáža.
– Mon lean hirbmat ollu oahppan ja dovddan vuollegašvuođa ja áddejumi min iežame duogážii ja árbái, dadjá Magdalena.
TV-ráiddus mii beassat čuovvut oappášguovtto mátki Sámis, gos deaivvadeaba sihke oahpes ja amas olbmuid, davvin luksa. Soai dovdaba gullevašvuođa ja nanu sohkagullevašvuođa.
– Muhtimin gal letne dovdan ahte bahkkejetne olbmuid nala, muhto buohkat gal leat munno nu fiidnáid váldán vuostá.
”Asfaltesápmelaččat”
Logi jagi dás ovdal mearrideigga Hannah ja Magdalena čiekŋudit iežaska duogážii. Soai bajásšattaiga Stuehkies ja dadjaba ahte soai leaba ”asfaltesápmelaččat” geat leaba bajásšaddan suovasbiergguin ja čázehiiguin. Áhkus soai gulaiga muitalusaid.
– Sus leai oktavuohta sihke luondduin ja vuoigŋalašmáilmmiin ja munno mielas lea dat leamaš veaháš gelddolaš, dadjá Hannah.
Vaikko sudno stuora beroštupmi sámi kultuvrii lea nu ođas de goitge dovdaba ovddasvástádusa juohkit dieđu sudno máhtus.
– Munnos lea ovddasvástádus juohkit dán máhtu nu bures go sáhtte lasihit áddejumi ja máhtu sápmelaččain.
”Typihkalaš sápmelaččat” čájehuvvo vuosttaš gearddi skábmamánu 14. beaivvi UR-playas.