Håkan Jonsson lei mielde álggaheamis 30 jagi dás ovdal. Son ovddasta Bivdo- ja guolástansámiid ja lea juste dál gaskkamuttus nuppi mandáhtaáigodagas stivrajođiheaddjin.
Son oaidná sihke buriid ja heajus beliid Sámedikkis.
– Buorre bealli lea ahte mis lea báiki gos min sápmelaččat sáhttit deaivvadit ja digaštallat, dadjá Håkan Jonsson SVT Sápmái.
Muhto sus ledje aŋkke eanet vuordámušat go lea sáhka sámi iešmearrideami birra.
”Mii eat lea ovdánan nu olu”
– 30- jagis mu mielas mii eat lea ovdánan nu olu.
Håkan Jonsson lea behtohallan go Sámedikkis lea nu unnán duođalaš fápmu.
– Mii leat beare okta ásahus gos sáhttit ovdanbuktit min oaiviliid, muhto duođalaš ja čielga mearrádusaid mat buktet váikkuhusaid eai bálljo gávdno.
Sámi iešmearrideapmi lea deháleamos jearaldat mainna bargat vai Sámediggi galgá doaibmat buoremus vugiid mielde boahtteáiggis, dadjá Jonsson.
Iešmearrideapmi lea dehálaš
– Iešmearrideapmi go lea sáhka eatnamiid birra lea hui dehálaš. Eanan hal lea vuođđu sámi ealáhusain ja kultuvrras ja eatnama haga mii eat gávdno álbmogin.
Okta váttisvuohta olahit dohko lea Sámedikki earenoamáš huksehus, sihke álbmotválljejuvvon ásahussan muhto maiddai eiseváldin, meidne Jonsson.
– Mii leat eiseváldi ruoŧa ráđđehusa vuolde. Vai mii galgat oažžut eanet dadjamus, de mearkkaša ahte muhtin oasit fertejit eretváldojuvvot eiseváldeoasis. Ahte mii sáhttit mearridit muhtin jearaldagaid birra mat odne leat ráđđehusa beavddis.
Makkár jearaldagat?
– Okta ovdamearka lea Gállok ja minerálaroggamus mii planerejuvvo doppe. Jus mii dárkilit gieldit dan, de sávvamis boahtteáiggis ii šattá ruvkeroggamus doppe, dadjá Håkan Jonsson.
