Eurohparáđđi lea juohkán bálkkášumi ”European Museum of the Year Award” juohke jagi 1977 rájes.

Ledje oktiibuot 50 eurohpálaš museat mat gilvaledje ja leai Sámemusea Siida Anáris suomabealde mii vuittii dán jagi. Ja sii vuosttáiválde bálkkášumi Portimão-gávpogis Portugalas.

– Sámemusea Siida lea álgoálbmotmusea earreliiggánit sámiide. Muhto mii leat hui ilolažžat das mot min historjá maid guoskkaha Eurohpa museisuorggi ja olbmuid miehtá máilmmi, dajai Siida musea direktevra Taina Pieski sártnistis preassadieđáhusa jelgii.

Musea ođđa váldočájáhusas muitalit sámit ieža sin iežas muitalusaid. Badjel 300 olbmo leat oasálasttan go leat válbmen čájáhusa.

– Mii sávvat ahte dát bálkkášupmi addá midjiide fámuid joatkit registrerenbarggu mii lea deaŧálas min servvodahkii. Dán bargui dárbbašit doarjaga olles eurohpálaš museasuorggis vai min máttuid dávvirat besset ruoktot Sápmái, dadjá Pieski.

Sámemusea vuođđuduvvui 1959 ja 1998 rahpe musea dálá dálus maid suopmelaš arkiteakta Juhani Pallasmaa lea hábmen. Dán dálus lea maid luondduguovddáš.