Maŋŋel čieža vahku jiekŋadoajáris Oden lea turistafitnodat eaiggát ja boazodoalli Erik Sarri fas ruovttoluotta Ruoŧas. Son lea leamašan mielde dutkanekspedišuvnnas davvi Ruonáeatnamis.
– Dat lea juoga maid sáhttá čálestit eallima girjái, dat lei oba erenomáš reaisu, dadjá Sarri.
”Eat oaidnan ovttage olbmo”
Poláradutkančállingoddi láidii ekspedišuvnna ja dan ulbmil lei ollet dan amas Victoria vutnii ja Ostenfelde jiehkkái. Áigumuš lei dutkat movt dálkkadatrievdadeamit leat váikkuhan guovllu.
– Mii leimme measta čieža vahku davvi Ruonáeatnamis ja eat oiadnan ovttage olbmo dahje dámpa, dušše ealliid.
Jiekŋaguovža vákta ja njiččehas dárkojeaddji
Erik Sarri bargu lei earret eará sudjet ekspedišuvnna jiekŋaguovžžain ja dokumenteret mera njiččehiid.
– Ledje sihke njuorjjut, čoarvebuvjjat, lottit ja jiekŋaguovžžat. Čohkahedjen máŋga diimmuid stáfus ja giikarasten.
”Lea polára sáttoáhpi”
Vaikko Erik Sarri árgabeaivvalaččaid bargá duoddaris ja lea hárjánan šattohis birrasii de atná ahte Ruonáeana lea šattoheamet.
– Sáhttá measta dadjat ahte lea polára sáttoáhpi. Ii leat nu olu šaddodat davimus Ruonáeatnamis.
Sarri muitala ahte muskavuovssáin ii leat nu olu borrámuš doppe. Bohccot eai livčče goassige birget doppe go lea nu heajos guohtun, son dadjá.
Muhto vaikko lea nu šattohis biras de son ii livččii eahpidit čuovvut mielde fas.
– Jus Oden livččii jorggihit davás fas de livččen sáhttit čuovvut mielde, dat lei dakkár vásahus, dadjá Erik Sarri.
