Andaras Outakoski lea giellaambassadevran bargan mánáiguin ja nuoraiguin ja movttiidahttán sin hupmat eanet sámegiela.
Dan ovddas son ožžo sámesearvvi nuoraid bálkkašumi.
Lei somá – ja oahpaime sámegiela
Searvi rámida su.
”Don leat čájehan movt nuorain sáhttá leahkit mearrideaddji rolla nannemis ja seailluheami sámegiela. Don leat dahkan dán barggu stuora beroštumiin ja čájehan ahte giella lea eanet go sánit – dat lea identitehta, kultuvra ja searvevuohta”, sii čállet vuođuštusas.
Ieš son lea vehá udju go SVT Sápmi deaivvada suinna.
– Dovdui bures. In dieđe manin mon vuiten, dadjá son.
Son joatká:
– Mon bargen mánáiguin ja nuoraiguin. Mii barggaime aktivitehtaid ja barggaime eará diŋggaid mat leat somá ja seamma áiggi mii oahpaime sámegiela.
Lea rahpan vejolašvuođaid sámi dáiddáriidda
Michael Lindblad ožžo gudnebálkkašumi iežas guhkes barggu Sámi ovddas. Son lei Såhkie sámesearvvi ságadoalli 20 jagi ja Ubmejen biejvieh dáiddalaš jođiheaddji ja álggaheaddji.
Son maid rámiduvvo vuođuštusas.
”Don leat hui čeahppi ráhkadit oktavuođaid ja ovttasbargguid – sihke Sámis ja máilmmiviidosaččat. Don leat rahpan vejolašvuođaid sámi dáiddáriidda ja kulturbargiide. Iežat áŋgiris bargguin ja beroštumiin don leat riggodahttán sámi servvodaga hui viidát. Dan ovddas mii leat nu giitevaččat!”, čállá searvi.
Goappašagat oaččuiga maid 1500 ruvnnu.