Elsa Idivuoma, Sanna-Marja Tuorda ja Sara Labba leat dat vuosttaš duojárat geat ožžot gesällreivve dipmaduojis, čállá Sameslöjdsstiftelsen preassadieđáhusas.
– Lea okta duojár, Anders Svonni, gii ovdal lea ožžon gesällreivve garraduojis, ja dal mii leat rámis go mis leat min vuosttaš gesällat dipmaduojis. Dát lokte duoji ealáhusdoaibman ja čalmmostahttá duoji iežá giehtaduodjedoaimmain, dadjá Sámi Duoji doaibmajođiheaddji Johanna Njaita.
”Lea niegadan guhká dán birra”
Sis boahtá leahkit oktasaš čájáhus Johkamohki márkaniin boahtte jagi.
– Mus lea guhká leamašan niehku váldit gesällreivve ja mannan čavčča ohcen gesällgeahččaleami. Mus lea leamašan buorre doarjja veagas, rátnáin ja mu bagadallis. Gesällreive čájeha ahte olbmos lea čehpodat iežas suorggis ja addá buoret ipmárdusa duojáriidda, juoga mii lea dehálaš munnje, dadjá Sanna-Marja Tuorda.
Lea Ruoŧa giehtaduojeráđđi mii geige reivve máŋŋel go duojár lea čađahan geahččaleami mii lea hábmejuvvon ovttas sierra ealahussuorgeorganisášuvnnaiguin.
– Mon jurddašan ahte dipmaduodji ožžo stuorit árvvu Ruoŧa servvodagas go gávdnojit olbmot geain lea gesällreive, dadjá Sara Labba.