Mánnodaga almmuhii Norgga Ráđđehus boahtte jagi stáhtabušeahta árvalusa. Das árvalit loktet juolludeami sámi doaimmaide 1,67 gitta 1,7 miljárdda ruvnnu rádjai.

Muhto eanas oassi ruđas manná earaide go sámediggái, earret eará sámi ofelaččaide, doarjja sámi filmmaide, sámi dearvvašvuohta, skuvlii ja gielaide.

Sámediggi lea behtton. Ráđđehus árvlala juolludit 700 miljovnna ruvnnu sámediggái boahte jagi bušeahtas ja dat lea 55 miljovnna eanet go diibmá.

Muhto sámediggi lei vuordán 300 miljovdnasaš lasáhusa. RUnar Myrnes Balto, Norgga sámedikki stivrras, ii leat duhtavaš man ge láhkai.

– Ráđđehus lea rihkkon sin lohpádusaid sápmelaččaide. Álggu rájes lohpidedje olu ruđa gillii ja kultuvrii. Dat ii leat boahtán dán háve ge. Dat ii leat man ge láhkai doarvái, ja dat ii daga ahte Sámediggi sáhttá sihkkarastit giela ja kulturdoaimmaid boahtte jagi, dadjá son NRK Sápmái.

”Eai vuorut sámi álbmoga”

Vaikko sámediggi ii oaččo dan meari maid háliidit de goitge doivot ahte rievdá. Sii galget dál ságastit Sosialisttalaš Gurutbellodagan guhte lea ráđđehusa ovttasbargi bušeahttas.

– Sii leat ovdal čájehan beroštumi sámi áššiide. Mii fertet luohttit ahte sii fas dahket dan barggu ja vuoruhit sámi servvodaga.

Stuoradikki várreáirras Hilde Marie Gaebpie Danielsen, Sosialisttalaš Gurutbellodagas bušeahta birra:

– Sii fas čájehit ahte eai vuorut sámi álbmoga, ja duvdet SG ala sámi áššiid ovddasvástádusa. Mii leat dál bušeahttaráđđádallamiidda, ja váldet mielde min sámi giela-, kultuvrra- ja dearvvašvuođavuoruhemiid, son dadjá.