Jahkásaš sámi kulturfestivála lea dál álgán Ubmis, muhto sii geat fitnet Ubmis dán vahkus eai boađe oaidnit makkárge sámegiel “Ubmeje” galbbaid. 

Ášši sámegiel galbbaid birra lea vánddardan duohkot diehke sierra instánssaid bokte.  

– Ii gávdno makkárge vuosteháhku báikkálaččaid muhto váttisvuođat leat boahtán ain dađistaga.    

Ii leat beare leamašan oažžut lobi bidjat bajás galbba, fertii mannat čađa máŋga instánssaid bokte vuos, dadjá Eva Concradzon.   

 Sámedikki vástádus  

Loahpageažis čakčamánus dohkkehii gielddastivra Ubmis “Ubmeje” nama ja ášši lea dál Lantmäterietis ja Sámedikkis.  

 – Sámediggi vástida báikenammačujuhusaid Lantmäterias guhte lea mearrideaddji orgána go lea sáhka báikenamaid birra”, čállá Anita Kitok, Sámedikki giella ja oahpahusjođiheaddji e-poasta bokte ja joatká: 

  – Sámediggi lea e-poastaságastallamiid bokte Ubmi gieldda unnitlogukoordináhtorin evttohan Ubmi gildii ahte vuohkkaseamos vuohki lea fas sáddet sisa ohcamuša Lantmäteriai. Dát lea ođđaseamos diehtu maid Sámedikkis lea dán áššis”, son čállá.  

Ožžon dáiddagalbba  

Dan botta go vurdet dohkkehusa leat dan sadjái ceggen dáiddagalbba maid norgga dáiddár Elin Már Øyen lea dahkan.  

– Sus lei mielde dat čájálmasain maid son de skeŋkii Ubmi gildii ja sii leat leamaš siivot ja luoikan dan midjiide, dadjá Eva Conradzon.