1996:s heaittihedje Viscaria veaikeruvkki, moadde gilomehtera olggobealde Girona dološ guovddaža, danin go ii lean šat gánnáhahtti.
Muhto 2019 álggus bođii diehtu ahte ruoŧa ruvke- ja prospekterenfidnodat Copperstone Resources hálidii fas rahpat ruvkki maŋŋel go ostte buot ossosiid australialaš Avalon mineralan.
Njukčamánus 2022:s sáddii Copperstone Resources biraslobiohcamuša eanan- ja birasduopmostullui. Laevas ja Gabná čearut váide mearrádusa go oaivvildedje massit guohtuneatnamiid.
Fállet iežá eatnamiid
Copperstone Resources lea dahkan boazodoaluanaliissa mii čájeha ahte ruvkeváikkuhusat eai boađe váikkuhit dán guovtti čearu nu ollu. Muhto dasa gal čearut eai jáhke ja leat ráđđedallan Copperstoniin geat hálidit addit iežá eatnamiid buhtadussan.
-Mii massit johtingeainnu ja guohtuneatnamiid, dajai Niila Inga, Laevas čearu sátnjođigheaddji, Sámeradio golggotmánus.
Duopmostuolus mearridit
Dál galgá ášši mearriduvvot duopmostuolus ja otne álget ráđđedallamat ja bistet guovvamánu 21 beaivvi rádjái.
Ruvkefitnodat vuordá oažžut biraslobi dán vuosttaš jahkebeali ja ikte, mánnodaga, dieđihii Copperstone ahte áigot álggahit guorahallama jus Viscariaruvkki lea gánnáhatti, jus sáhttet rahpat ruvkki 2026:s.
-Dan máhcaheami maid mii leat ruhtadeaddjiin ja báŋkkuin ožžon lea ahte sii hálidit ahte vuođđu lea nanus ja bures guorahallon.
Álggahit barggu guorahallat gánnáheami mii sihkkarastá ahte mii geavahit min návccaid buoremus lági mielde, dadja Jörgen Olsson, Cpooerstone hoavda.
