Otne Sámediggi hálddaša boazoealáhusáššiid. Muhto Guovssonásti oaivvilda ahte buot boazodoalloáššit galget hálddašuvvot politihkalaš sorjjasmeahttun eiseválddis olggobealde Sámedikki.
SVT Sápmi lea ovdal muitalan ahte bellodat evttoha mošuvnnas ahte Sámediggi galgá váldit oktavuođa ráđđehusain ja sihtat sin guorahallat dakkár eiseválddi.
”Stuora dárbu”
Bellodat ii leat duhtavaš movt dálá stivra hálddaša boazoealáhusáššiid.
– Mii oaidnit dárbbu oažžut eret boazoealáhusáššiid Sámedikkis, ja sivvan dasa lea movt stivra lea láhtten dán mandáhtaáigodaga, dadjá Marita Stinnerbom, Guovssonásti.
Mii ii doaimma?
– Stivra hálddaša ruđaid mat gullojit boazoealáhussii ja Håkan Jonsson meidne ahte diehtá ekonomiija dili, muhto son ii atte midjiide vejolašvuođaid.
”Diktit leahkit nu movt lea dál”
Sámedikki stivra hilgo mošuvnna čilgehusain ahte dat livčče unnidan Sámedikki iešmearrideami.
– Buoremusat lea diktit leahkit nu movt dál lea. Sámediggi galgá hálddašit boazoealáhusáššiid, dadjá stivraságadoalli Håkan Jonsson ja joatká:
– Mii eat dieđe mii dáhpáhuvvá jus nu šaddá. Ovdal lea Eanandoallodoaimmahat hálddašan daid áššiid. Dál rievdadit dán ortnega ii leat mu mielas realisttalaš.
Marita Stinnerbom meidne ahte sin evttohus ii livčče váikkuhan iešmearrideami.
– Mii oaivvildit ahte mii doalahit iešmearrideami go sirdit boazoealáhusolbmuid sierra lávdegoddái, muhto Sámedikki politihkkárat eai galgga dainna bargat, son dadjá.
