Sámedikki álbmotválljejuvvon politihkkarat čoahkkanit distaga ja gaskavahku dán jagáš máŋŋemus dievasčoahkkimii Váhčirii.
Dievasčoahkkin lea oaniduvvon ovttain beivviin sámedikki heajos ruhtadili dihte.
– Stivra barga hui garrasit oažžut bušeahta bálánsii. dadja stivraságadoalii Håkan Jonsson guhte vuordá garra bušeahtadigáštallama.
Sávva beassat johtui parlamentáralaš lávdegottiin
Håkan Jonsson sávvá ahte parlamentáralaš lávdegoddi beassa johtui maid dievasčoahkkin mearridii miessemánus.
Parlamentáralaš lávdegotti galga buoridit sámedikki barggu ja heivehit njuolggádusčállosiid doibmii.
– Opposišuvdna ii háliidan mannán dievasčoahkkmis bidjat láhttuid muhto sávan ahte dahket dan dál, juovlamanu, muitala Jonsson ja joatká:
– Doaivumis bargu válbmana álgo 2025:s.
”Áidna báiki gos beassat ovdanbuktit min politiihka”
Opposišuvdna moaitá go leat oanidan dievasčoahkkima ja go stivra ii hálddaš ruhtadoalu vai eai dárbbaš digáštallat dan.
– Dievasčoahkkin lea áidna báiki gos mii sáhttit digáštallat ja ovdanbuktit min politiihka. Hárehisvuohta stivrras go eai leat bearráigeahččan goluid. dadja Marianne Gråik, Sámiid Riikabellodagas.
Son deattuha golbma deaŧálaš čuoggá mát váilot stivrra čilgehusas ja maid som áigo loktet.
– Giellaguovddáža ovdaneamis, mii doppe dáhpahuvva? Ja dan ahte stivra lea rievdadan Giellaguovddáža sáddagottiortnega. Ja de borusstrategiija, dan gal orro stivra oalat láhppan , dadja Marianne Gråik.
Moaitá Jonssone čealkaga
Ráddehus dieđihii easkaládje ahte áigot heaittihit Láidumlávdegotti ja bidjat johtui ođđa boazodoalulágaguorahallama
Ja man ollu lea stivra ja Håkan Jonsson váikkuhan dán mearrradussii, jearrá Marianne Gråik.
Eareliiggánit son moaitá Håkan Jonssone go son illuda go boahtá ođđa lávdegoddi.
– Lea imáš oaivil vaikko ii leat vel oaidnán direktiivvaid, dadja Marianne Gråik.