Diibmá Golggotmánus válljii Anders Lidén heaitit ságadoallin sámi Duohtavuođakommišuvnnas.
Disdaga almmuhii ráđđehus ođđa ságadoalli, Lena Nyberg. Golggotmánu rádjai son lei MUCF:e generáladirektevra, dat lea eiseváldi mii hálddaša nuoraid- ja siviilaservvodaga áššiid. Son álgá ođđa bargui 8 beaivvi Cuoŋománus.
– Dát lea oassi olmmošvuoigatvuođa áššiin ja mon anán ahte dat áššit leat deháleappot otna beaivvi go goassege ovdal. Go máilbmi lea dákkár de lea dehálaš ahte mii olles áiggi hupmat olmmošvuoigatvuođaid birra ja danin dat dovdo dego hui gelddolaš ja dehálaš bargu, son muitala SVT Sápmái.
”Hirpmástuvvan go lea nu unnán máhttu”
Makkár vuordámušat dus leat?
– Geahččalit veahkehit loktet máhtu Ruoŧa álgoálbmoga birra. Lean hirpmástuvvan go lea nu unnán máhttu sápmelaččaid eallindilis ja historjjás, sávan ahte beasan juohkit máhtu.
Sus lea maid čielga govva movt su ovdalaš vásáhusat bohtet leahkit ávkin kommišuvdnii.
– Mus leat olu dieđut das maid almmolaš suorggit dárbbašit ja makkár máhtuid dárbbašit ja mon jáhkán ahte dat lea dehálaš. Mon lean maid bargan olu sámi nuoraiguin ja mánáid diliin no ahte mus lea olu máhttu maid buvttan bargui.
Håkan Jonsson: ”Dat lei áigi”
Sámedikki stivraságadoalli Håkan Jonsson lea duhtivaš go lea ođđa ságadoalli sajis.
– Dat lei áigi, min dárbbašit ságadoalli no ahte Duohtavuođakommišuvnna bargu sáhttá joatkit.
Jonsson muitala ahte sámediggi lea váikkuhan proseassa go válljejedje ođđa ságadoalli.
– Sámedikki stivrenjoavku lei ovttamielalaš ja atne ahte lei buorre namma, mii sávvat olu lihkku Lenai iežas dehálaš barggus, son dadjá.
Duohtavuođakommišuvdna lea 2021 rájes guorahallan ja iskkan dan politihka maid sápmelaččat lea vásihan historjjálaččat ja makkár bohtosiid dat dagahedje sámi álbmogii. Barggu loahpalaš raporta galgá leahkit válmmas 1 beaivvi Juovlamánus.