Duohtavuođakommišuvnnas ii leat leamašan ságadoalli Golggotmánu rájes. Dalle heittii Anders Lidén go ledje sierra oaivilat mo bargu galggai čađahuvvot.
Guovvamánus evttohii ráđđehus namá sámedikki stivrenjovkui – muhto ovttamielalaš stivrenjoavku bijai vuostá.
Muhto dál leat loahpas soabadan ja disdaga almmuhuvvui Lena Nyberg ođđa ságadoallin ja son álgá ođđa bargui 8 beaivvi Cuoŋománus.
Liljestrand: ”Máhtolaš jođiheaddji”
Diimmá Golggotmánu rádjái son lei MUCF:e generáladirektevra, dat lea eiseváldi mii hálddaša nuoraid- ja siviilaservvodaga áššiid. Son lea maid leamašan mánáid áittardeaddji ja beaivválaš jođiheaddji Skärgårdsstiftelsenis.
– Iluin mon dieđihan ahte Lena Nyberg lea válljejuvvon Duohtavuođakommišuvnna ođđa ságadoallin. Lena Nyberg lea máhtolaš jođiheaddji guhte guhka lea bargan áššiiguin mat gusket olmmošvuoigatvuođaid. Duohtavuođakommišuvnnas lea dehálaš bargu ja lea hui buorre go ođđa ságadoalli lea sajis, cealká kulturministtar Parisa Liljestrand preassadieđáhusas.
Jonsson: ”Sus lea gelbbolašvuohta”
Maiddái sámedikki stivraságadoalli Håkan Jonsson lea duhtivaš. – Mis lea ságadoalli gii máhttá dán barggu. Sus lea dat gelbbolašvuohta mii gáibiduvvo. Lena Nyberg lea bargan áššiiguin mat gusket unnitloguálbmogiid, ja dat lea nanosmahttin.
Lea go sámediggi váikkuhan proseassa?
– Lea. Ráđđehus dat mearrida muhto mis lea leamašan oktavuohta. Lean ilus go lea ođđa ságadoalli. Dovdo dego livččii oktanuppelogát diimmus, dadjá Håkan Jonsson.
Duohtavuođakommišuvdna lea 2021 rájes guorahallan ja iskkan dan politihka maid sápmelaččat lea vásihan historjjálaččat ja makkár bohtosiid dat dagahedje sámi álbmogii. Barggu loahpalaš raporta galgá leahkit válmmas 1 beaivvi Juovlamánus.