Diibmá golggotmánus válljii Anders Lidén heaitit ságadoallin sámi Duohtavuođakommišuvnnas.
Disdaga almmuhii ráđđehus ođđa ságadoalli, Lena Nyberg. Golggotmánu rádjai son lei MUCF:e generáladirektevra, dat lea eiseváldi mii hálddaša nuoraid- ja siviilaservvodaga áššiid. Son álgá ođđa bargui cuoŋománu 8. beaivvi.
– Dát lea oassi olmmošvuoigatvuođa áššiin ja mon anán ahte dat áššit leat deháleappot otna beaivvi go goassege ovdal. Go máilbmi lea dákkár de lea dehálaš ahte mii olles áiggi hupmat olmmošvuoigatvuođa áššiin ja danin dovdo bargu hui gelddolaš ja dehálaš, son muitala SVT Sápmái.
”Hirpmástuvvan go lea nu unnán máhttu”
Makkár vuordámušat dus leat?
– Geahččalit veahkehit loktet máhtu Ruoŧa álgoálbmogis. Lean hirpmástuvvan go lea nu unnán máhttu sápmelaččaid eallindilis ja historjjás, sávan ahte beasan juohkit máhtu.
Sus lea maid čielga govva movt su ovdalaš vásáhusat leat ávkin kommišuvdnii.
– Mus leat olu dieđut das maid almmolaš suorggit dárbbašit ja makkár máhtuid dárbbašit ja mon jáhkán ahte dat lea dehálaš. Mon lean maid bargan olu sámi nuoraid ja mánáid diliin nu ahte mus gal lea olu máhttu dán bargui.
Håkan Jonsson: ”Viimmat”
Sámedikki stivraságadoalli Håkan Jonsson lea duhtivaš go leat virgádan ođđa ságadoalli.
– Viimmat, min dárbbašit ge ságadoalli vai Duohtavuođakommišuvnna bargu sáhttá joatkit.
Jonsson muitala ahte sámediggi lea beassan váikkuhit proseassa go leat válljen ođđa ságadoalli.
– Sámedikki stivrenjoavku lei ovttamielalaš ja oaivvildedje ahte lei buorre namma. Mii sávvat olu lihkku Lenai dehálaš bargguin, son dadjá.
Duohtavuođakommišuvdna lea 2021 rájes guorahallan ja iskkan dan politihka maid sápmelaččat lea vásihan historjjálaččat ja movt dat váikkuhii sámi álbmogii. Barggu loahpalaš raporta galgá leat válmmas juovlamánu 1. beaivvi.