Geahččit duođas liikojedje Vaiana 2:ii go leai vuosttaščájálmas.
Filbma lea juo dán rádjái diinen 386 miljuvnna dollara. Ja dát lea okta dain filmmain dán jagi mii diine eanemusat vuosttaščájálmasas.
Filbma lea muitalus nieiddažis Vaiana ja suolohasain Polynesas. Máŋggat rollat leat váldon guovllu eamiálbmotmuitalusain.
Vuosttaš filbma oaččui moaitámušaid
Go almmuhedje vuosttaš filmma 2016:s de máŋga eamiálbmotovddasteaddji moite dan. Sii moite go Disney ávkkástalai eamiálbmogiid árbevieruid. Maŋŋel moaitámuša šattai filbmafitnodat earret eará geassádit vuovdmis biktasa mii govvidii Maui. Dat rolla lea movttidahtton ovtta bealleipmilis masa olbmot ain jáhkket.
Dál go nuppi filmmas leai vuosttaščájálmasas de eai gullo vel moaitámušat. Dalle go Disney dagai sámi veršuvnnaid Frostfilmmain de dat ledje sámegillii vuosttaščájálmasas ja Vaiana 2 leai Máorigillii dalle go čájehedje vuosttaš gearddi.
Filbmaráhkadeamis leat máid máŋggat eamiálbmotovddasteaddjit leamaš seahka.
”Leai unnán máhttu”
Okta sis leai samoanalaš govvadáiddár Michel Mulipola. Son muitala Te Ao Máori Newsii movt son beasai váikkuhit sisdoalu. Earret eará son dagai giehtačállosa filbmii. Muhto maid vuvddii jurdagiid ja searvai ságástallmiin vai filbma govvida suolohasaid nu movt sii ellet.
– Mon lean samoanalaš eanet go maid lean dáiddár. Go mon barggan de lea mu ovddasvástádus doalahit iežan kultuvrra ja giela, dadja son.
Son joatká:
– Leat ollu hástalusat, eareliiggánit go barga Disneyn, danin go sis ii leat ollu máhttu min kultuvrrain ja sii dávjá jáhkket ahte min kultuvrrat leat ovttageardánat.
Lágidedje giellagurssiid
Máŋgi son šattai sártnuhit, muhto son goit vásiha ahte filbmabuvttadeaddjit guldaledje.
Son namuha ovdamearka dihte movt filmmas galga jietnadit namaid. Polynesia álbmogiin leat njálmmálaš árbevierut. Ja dalle lea jietnadeapmi hui deaŧálaš ja son evttuhii doallat gursse bargiide movt sániid galga jietnadit ja Disney mieđihii dasa.
Muhto Mulipola ii lean okto, Son barggai ovttas maorolaš giehtačálliin Bryson Chun ja Lucyola Langi guhte lea govvadáiddár Tongas eret.