–Dákkáris in leat ovdal oaidnán ovdamearkka, dadjá sivilarievtti professor Birgitta Nyström, Lund universitehtas.
Stáhta hoavdasoahpamuša mielde eiseváldehoavddain guđa mánnosaš eretcealkináigi.
Muhto guovtti Sámedikki jođihanjoavkku guđa ossodathoavddas leat leamašan eará dilli geasi rájes. Čállingoddehoavda Fredrik Österling čálii dalle vuollái ođđa soahpamušaid main mielde guokte hoavdda oažžuba ieža mearridit iežaska eretcealkináiggiin jos mearrideaba heaitit.
–Ahte addá bargái vejolašvuođa iešheanalaččat mearridit, vel eretcealkináiggi álgima maŋŋáge, dies ii leat oaidnán makkárge ovdamearkka ovdal, dadjá Birgitta Nyström, sivilarievtti professor Lund universitehtas.
Iežaska bivdagis
Dábálaš lea čállit soahpamušaid main eretcealkináigi oaniduvvo guovtti dahje golmma mánnui, dadjá Nyström. Muhto vaikko ii leat dábálaš de ii leat lobiheapmi dahkat nugo Sámedikki čállingoddehoavda. Seammás sáhttá ná árvvas soahpamušas leat stuorra árvu hoavddaide.
–Jos lea čatnon gitta nu guhká go guđa mánnui de lea vejolaš ahte lea ožžon ođđa fálaldaga ja lea bures vejolaš ahte ođđa bargoaddi ii leat nu gearggus vuordit guhtta mánu.
Jonsson: ”Šohkka”
Sámedikki stivraságadoalli Håkan Jonsson (JoF) dadjá iežas gullan soahpamušain ovddit vahkus.
–Čuoččuhivččen ahte diehtu bođii measta jo šohkkan, dadjá son.
Su mielas livččii stivra galgan oažžut dieđu ovdalgo áššis mearriduvvui.
–Mis lea ollislaš ovddasvástádus Sámedikkis, danin ferte mii maid oažžut dieđuja soaitá vel oaivvilditge dákkár stuorra mearrádusain, dadjáHåkan Jonsson.
Ii dáhto kommenteret
ČállingoddehoavdaFredrik Österling lea leamašan buohccindieđihuvvon geasi rájes maŋŋá go konflikta stivrrain ain vearránii geassemánus.Son biehttala jearahallama SVT Sámiin, muhto čujuha iežas guoskkahit ášši čilgehusastis Stáhta ovddasvástáduslávdegoddái. Doppe čállá son hoavddaid ieža dáhtton čállit ođđa soahpamušaid.
Österling mielde mieđai son soahpamušaide gáhtten dihte bargiidis, go stivra ja kansliija gaskasaš konflikta dagai hoavddaid bargobirrasa eahpesihkarin. Son lasiha vel telefondieđu bokte SVT Sápmái ahte dábálaččat dušše kanslihoavdda bargosoahpamuš loktejuvvo stivrii.
Ii oktage eará Sámedikki jođihanjoavkkus leat ožžon sullasaš soahpamuša. Eará hoavddaid guoská stáhta hoavdasoahpamuš jos celket eret virggiset.