Laŋás leat dievva juovlačiŋat, bihpporgáhkut ja juovlamustejuhkosat go SVT Sápmi deaivvada váldorollaneavttáriiguin. Soai láhtteba dego oappážagat ja neaktiba maid oappážagaid.

”Muohtaniegut” dáhpahusat leat Gavmoduoddaris gosa muohta ii leat gahččán vaikko iežá duoddariida lea. Ellá Márge Nutti ja Hedvig Åhrén neaktiba oappážagaid Ristin ja Aila geat imaštallaba makkár čiegusvuođat duoddaris leat.

– Mon lean balus maid olbmot galget jurddašit, mon lean skievis ja ilus. Lea jahkki áigi go heittiime báddet ja dovdo hui somá go viimmat sáddejuvvo, dadjá Hedvig Åhrén.

Sámi luŋkarahpan

Dat lea Ruoŧa vuosttas sámi juovlakaleandarráidu ja dasa lassin boahta maid sámi luŋkarahpan gos beassa gullat muitalusaid sámi mytologiijas. Marit Kuhmunen Blom láidesta dan SVT Playas.

– Dat mearkkaša hui olu. Mon lean vuordan juoida dákkara dan rájes go ledjen unni. Mon lean nu ilus ja movttet go oaččuime neaktit dáid rollaid Ruoŧa vuosttas sámi juovlakaleandarráiddus, dadjá Nutti.

Neavttár Christine Meltzer ja bagadalli Jonas Wallerström leaigga maid mielde pressadieđáhusas. Wallerströme ”Muohtaniegut”-jurdda vuođđuduvvo su easká fuomašuvvon beroštumis sámi mytologiijas, muohtaborggas, toga moivvis ja Elin Anna Labba girjjis ”Hearrat dat bidje min”.

– Toga- ja muohtamoivvis mon jurddašin ahte movt de jos muohta jávkkašii. De mon lohken dan girjji ja fuomašin ahte in dieđe maidege sámi mytologiija birra ja de skievistii.

”Muitalusas njuorasmahttá”

Meltzer neakta gielddastivrra ságadoalli, Lena Brittén, guhte lea heamssaš ja Wallerström buohtastahtta su Dolores Umbridgen, Harry Potter-máilmmis. Meltzer muitala ahte son lea váldán vuhtii árvvuid maid son lea ožžon báddemis ja dain fáttain man birra kaleandarráidu lea.

– Ahte jearrat lobi ja gudnejahttit luonddu, dan mii fertet muittuhit iežamet ja dat lea juoga maid mon válddán vuhtii. Dát muitalus njuorasmahttá mu ja danin mon anán ahte lea dehálaš dán jagi, dadjá son.

”Muohtaniegut” čájehuvvo SVT1 ja SVT Playas juovlamánu 1 beaivvi.