Vuođđudus Gaaltije ásahuvvui 1984 man ulbmil leai hálddašit KMA árbbi, Kvinnliga Missions Arbetare, ja sin doaimma Fjællgårdenis Hållanddas, Ååre gielddas.

De maŋŋel álggahii vuođđudus oarjánsámi kulturguovddáža Gaaltije ja leat doaibman ovdalaš Tullkammaris guovdu Staare 1999 rájis.

– Vuosttaš jagit ledje eahpesihkkarat, galge boarrásiidsiiddas hukset stuora sámi kulturguovddáža muhto ruhtá váillui. Vuođđudusa doaimmat bissehuvvujedje moatti jahkkái ja mii beasaime dán dállui 1999:s, muitala doaimmahushoavda Jerker Bexelius.

Dál ávvuda Gaaltije 40 jagi ja dan ávvudit stuorrát, lávvordaga lea earret eará rabas viessu ja ávvuborramuš.

– Mis lea ávvuborramuš sulli 90 olbmui.

”Joatkit ain ovdánit”

Vuođđudusa ulbmil lea jođihit doaimmaid mat leat buorrin sápmelaččaid kultuvrralaš ja risttalaš beroštumiide oarjánsámi kulturguovddáža bokte.

– Mii galgat ain ovddidit dákkár doaimmaid ja šaddat vel eambbo geasuheadji galledanbáiki sápmelaččaide, min váldojoavku. Muhto iežát maid sáhttet boahtit deike ja váldit oasi ja oahppat eambbo historjá sámi geahččanguovlluin, muhto maid dálá- ja boahtteáiggi.

Lorentz Sjulsson Åsdell, galledeaddji Likšus eret, oaivvilda ahte Gaaltije lea deaŧalaš servvodahkii.

– Dát lea hui movttiidahtti sidjiide geat dán guovllus barget dujiiguin ja muhtimat dáppe háliidit váldit iežaset kultuvrra ruovttoluotta ja dát lea oassi das, son dadjá.