Diibmá doalai Sámediggi Norgga bealde 20 čoahkkima ministariiguin. Suoma bealde gis ledje logi čoahkkima ja Ruoŧa bealde duššefal njeallje. Dás lea sáhka ministtaroktavuođain mat fátmmastit daid jeavddalaš nu gohčoduvvon ministarságastallamiid ja čiekŋudan eiseválddiságastallamat.

– Jus geahččá historjjálaččat, de leat njeallje čoahkkima eanet go maid ovddit stivrrat leat beassan doallat. Álgo 2000-logus de ledje dákkár čoahkkimat hárvenaččat, dadjá sámedikki ságadoalli Håkan Jonsson ja lasiha vel:

– Mii maid deaivvadit dávjá stáhtačálliiguin. Diibmá leai sullii oktii mánus ja mis leat maid telefovdnaoktavuođat. Dát oktavuođat leat maid deaŧalaččat.

Håkan Jonsson hirpmahuvva go gullá movt ránnjáriikkain lea, Suomas ja Norggas.

– Jus veardida Norggas, gos leat 20 deaivvadeami, de gal leat menddo unnán dáppe.

”Diekko lean beahttašuvvan”

Jonsson maid oaivvilda ahte deaŧaleamos ii leat gallii čoahkkinastá, muhto baicca dan maid doppe mearridit. Dainna son gal ii leat duhtivaš.

– Lea dieđusge deaŧalaš deaivvadit ministariiguin, sin mearrádusat váikkuhit dávjá sámedikki. Deaŧaleamos lea kvaliteahtta, maid doppe mearridit ja diekko lean beahttašuvvan. Min áššit eai leat dán rádjái dohkkehuvvon ministtarčoahkkimiin.

Manin Sámedikkis Norgga bealde leat eanet čoahkkimat go dis?

– Dan gal in dieđe. Mon doaivvun ahte ráđđehusa ja Sámedikki gaskkas lea ollát iežá kultuvra. Sis lea ollu eanet ruhta go mis. Doppe lea ollát eará oaidnu sápmelaččaide go dáppe.

Jus dii oažžubehtet fámu boahtte áigodaga, maid galgabehtet dahkat buoridit dili?

– Mon jáhkán ahte mii fertet leat sealvvibut ja vuoruhit dan maid mii háliidit joksat. Mii leat leamaš hui sealvvit parlameantahuksemiin, lasi ruđa sámi ealáhusaide, muhto das ii leat boađus, dadjá Håkan Jonsson.