Go Rodrigo Duterte beasai fápmui, de son lohpidii rievdadusaid. Máŋga filipiinnalačča sávve ahte lea loahppa korrupšuvnnas, bahádaguin ja lobihis gárrenmirkogávppiin ja Duterte lohpidii juste dan. Su soahti gárrenmirkkuid vuostá šattai gis soahtin siviilaálbmoga vuostá.

– Eatnit ja áhčit leat massán iežas mánáid soahtái mii ii ollenge guoskka sidjiide; ja sii dárbbašit vuoiggalašvuođa, dadjá eamiálbmotaktivista Joan Carling SVT Sápmái.

Son váldui giddagassii njukčamánu 11. beaivvi Riikkaidgaskasaš ráŋggáštanáššeduopmostuolu, ICC, geaskkuin go lea navdojuvvon rihkkon olmmošvuoigatvuođaid goddimiin Filipiinnas 2011 – 2019. Carling guhte lea dubmejuvvon terroristan Duterte áigodagas, cuiggoda ahte su politihkka lea deaividan buohkaid geat leat moaitán ráđđehusa.

– Sii geat leat njunnošis ja bealuštit olmmošvuoigatvuođaid šaddet giddagassii ja sivahallet sin billisteamis.

Son háliida ahte ICC galgá geahččat duođaštusaid mat fátmmastit olmmošvuoigatvuođa loavkidemiid.

Antiterroristaláhka

Badjel 30 jagi lea Carling dáistalan eamiálbmotvuoigatvuođanjulgosiid ovddas ja son cuiggoda ahte eamiálbmogat, nissonat, ja aktivisttat leat oaguhuvvon su stivrenáigodagas ja dat fertešii fátmmastuvvot ICC guorahallamii mii dál lea jođus.

– Fátmmastit olmmošvuoigatvuođa loavkidemiid guorahallamii attálii čielga signálaid iežá njunnošiidda ahte ferte doahttalit olmmošvuoigatvuođaid.

Carling lea maid leamaš váldočálli Asia Indigenous People's Pact (AIPP), bisttevaš mielláhttu ON:a eamiálbmotforumis ja dorjon áŋggirdemiid ruvke- ja čáhcefápmoviiddideamis eamiálbmotguovlluin.

– Mii leat gillán njunnošiid dihte geat leat beassan fápmui, ávkkástallan peršovnnalaš beroštumiid ja ráŋggáštan geafes olbmuid geat eai sáhte váikkuhit iežase dili.

Son sávvá ahte guorahallan su vearredaguin buktá rievdadusaid

– Dát addá doaivaga ahte olbmot oidnet min, ahte riikkaidgaskasaš servvodat buktá vuoiggalašvuođa ja veahkaválddálašvuohta addá ráŋggáštusa.