Ruoŧa ráđđehus lea mieđihan doaibmanlobi Jokkmokk Iron Mines fitnodahkii man oamasteaddji lea Beowulf Mining Englánddas mannat viidáseappot ruvkeplánain Gállogis Johkamohki suohkanis.  Dát lea okta lávki lagabui ruvkerahpama proseassas mii lea leamaš jođus ovcci jagi ja mas earret iežaid guoskevaš čearut ja biraslihkádus ja muhton stáhtalaš eiseválddit leat vuosttildan. 

Mieđihuvvon doaibmanlohpi man fitnodat lea ožžon ii mearkkaš ahte šaddá ruvki. Dal lea guhkes birasproseassa man ruvkefitnodat ferte dahkat, ahte ráđđehus lea addan doaibmanlobi ii leat seammá go ruvkeroggan muhto dat ruvkefitnodat sáhttá dal bargat viidáseappot ja guorahallat lea go ekonomalaš vejolašvuohta rahpat ruvkki.

Dal galgá fitnodat dahkat biras- ja váikkuhusgovvideami ja dat lea oalle viiddes proseassa mii sáhttá máksit lagabui 100 miljuvnna ruvnnu. Dat bargu lávi ádjanit ja dahkko dávjá čálálaččat eiseválddiiguin mat buktet oainnuid. Dát lea vuođđu mearrádussii man eana- ja birasduopmostuollu váldá ja fitnodat ferte nai vuosehit loahpalaš gánnáhahttiguorahallama.

Easka go fitnodat lea ožžon biraslobi, ja dat sáhttá ádjanit máŋggaid jagiid, de sáhttá boahtte lávki váldojuvvot ja dat lea ruhtadeapmi. Álggahit ruvkki máksá miljárddaid ja dasa ferte fitnodat gávdnat ruhtadeddjiid. 

Fillmmas oainnát SVT Sámi reporttár Ann Catrin Stenberg Partapuoli čilget proseassa.