Govvaráidosárgujeaddji Mats Jonsson lea áigeguovdil ođđa govvarománain ”Stinas jojk”. Girji lea Kristina Larsdottera birra guhte lei fuolki Jonssonii.
– Go bargen iežan ovddit girjjin, ”När vi var samer”, de fuobmajin ahte moai Kristina Larsdotteriin leimme fulkežagat. Mon ledjen gullan ja lohkan su birra Åke Lundgrene girjjiin, muhto šattái ollát iežá go oidnen movt leimme sogát, dadjá Mats Jonsson.
Eat dieđe maid son jurddašii
De bođii jurdda ahte čállit girjji Kristina birra. Olu lea čállon su birra muhto su iežas sánit eai leat seilon. Min diehtit gosa son mátkoštii muhto eat dieđe maid son jurddašii ja dovddái.
– Dáinna girjjiin mon geahččalan árvidit maid son jurddašii ja dovddái, dadjá son.
Girječállin lea addán sutnje ođđa áddejumi. Lea leamašan dehálaš sutnje govvidit Kristina eallima nu bures go vejolaš. Kristina lei hárjánan ahte olbmot gehčče su guhkkodaga dihte. Dan sii dahke olles su eallima ja dat lei su árgabeaivi, jáhkká Mats Jonsson.
– Go geahččalan govvidit ovtta su traumain de ii lean dat ahte olbmot gehčče, dat lei su árgabeaivi. Mon lohken Karolinska instituhtas protokollas ahte son ii sáhttán oažžut mánáid, dadjá Mats Jonsson.
Protokollas čužžo ahte son ii goassege ožžon mánodávdda ja Jonsson jáhkká ahte dat lei trauma sutnje.
– Ahte nu vuđolaš olmmošlaš diŋga dego mánnáoažžun fertii gal čuohčat garrasit sutnje.
”Son lei dábalaš olmmoš”
Máŋggas dihtet ahte Kristina Larsdotteris lei dávda mii dagái ahte son ii goassege heaitan šaddame ja son čájáhuvvui máŋggaid báikkiin miehta máilmmis.
– Muhto son lei goitge dábalaš olmmoš guhte vissásit čierui seamme go iežát.
Mats Jonsson muitala ahte leat leamašan olu dovddut go lea ráhkádan dán govvaromána muhte lea leamašan dehálaš sutnje čájehit olbmo, Kristina Larsdotter.
– Olbmuid ii galggá muitit buddestatnamáin. Mon gohčudan su Stina, dat lea doarvai, dadjá son.
Girji buohkaide
”Stinas jojk” lea Mats Jonssona viđát girji. Dat lea girji gaskaahkásiidda muhto son oaivvilda garrasit ahte dat soahpá buohkaide.
– Dat lea mánaidgirji muhto mon anán ahte dát girji lea buohkaide. Go dan lohkká de ii oba jurddašge ahte lea nuoraide.
